Lengo letu ni kufanikisha mawasiliano duniani kwa faragha. Huku mawasiliano yetu mengi yakizidi kuhamia mifumo ya dijitali kutoka ana kwa ana, tunatambua kwamba kuna upekee fulani wa kuketi na mtu na kushauriana naye uso kwa macho, mkielezana mawazo yenu kwa ujasiri, mkifahamu kwamba mnawasiliana kwa faragha na kwa wakati halisi. Uhuru wa kusema ukweli na kufungua roho, huku mkijua kwamba mazungumzo yenu hayanakiliwi na kuhifadhiwa mahali fulani milele.

Basi unafaa kuwa na uhuru wa kuamua ujumbe wako utadumu kwa muda gani. Tumezoea kuacha nakala dijitali ya karibu kila kitu tunachoandika hata bila kufikiria. Imekuwa kama daftari linaloandamana nasi kila mahali na kuunda rekodi ya kudumu ya kila kitu tunachosema. Hii ndiyo maana mwaka uliopita tulizindua ujumbe unaotoweka na hivi karibuni, tumeanzisha kipengele cha picha na video zinazotoweka pindi tu baada ya kuzitazama mara moja.

Leo tunafuraha ya kuwawezesha watumiaji wetu kuwa na udhibiti zaidi juu ya ujumbe wao na muda ambao ujumbe unadumu. Tuna vipengele vya kuwezesha ujumbe kutoweka kwa chaguomsingi, hali kadhalika vipindi tofauti vya muda ambao ujumbe unaweza kudumu.

Watumiaji wa WhatsApp sasa watakuwa na chaguo la kuwasha ujumbe unaotoweka kwenye soga zao zote mpya. Hali hii ikiwashwa, ujumbe wote mpya unaoanzisha ili kuwasiliana na mtu mwingine au ambao mtu anaanzisha ili kuwasiliana na wewe utatoweka baada ya muda uliochagua. Pia tumeongeza chaguo jipya wakati unaanzisha soga ya kikundi linalokuwezesha kuwasha hali hii unapoanzisha kikundi kipya. Kipengele hiki kipya ni cha hiari na hakibadili wala kufuta soga zako zozote zilizopo.

Pia tunaongeza chaguo mbili za muda ambao ujumbe unaotoweka utadumu: Saa 24 na siku 90, pamoja na chaguo lililopo la siku 7.

Kwa watu wanaochagua kuwasha hali ya ujumbe kutoweka kwa chaguomsingi, tunaonyesha ujumbe kwenye soga zako ili kuwajulisha watu muda chaguomsingi uliouchagua. Ujumbe huo hubainisha wazi kwamba si uamuzi unaomlenga mtu mmoja, bali ni chaguo la jinsi unavyotaka kuwasiliana na kila mtu kwenye WhatsApp kuanzia sasa kwenda mbele. Hata hivyo, kama ungependa ujumbe fulani udumu, ni rahisi kubadilisha.

Kutokuwa karibu na ndugu na marafiki kwa zaidi ya mwaka mmoja kumetudhihirishia wazi kwamba ingawa hatuwezi kuzungumza ana kwa ana, haimaanishi kwamba tunafaa kutojali faragha ya mawasiliano yetu ya binafsi. Tunaamini kuwa ujumbe unaotoweka pamoja na ufumbaji wa mwisho hadi mwisho ni vipengele viwili muhimu vinavyohimili jinsi ya kuwasiliana kwa faragha katika zama hizi. Vipengele hivi vinatuleta karibu na kupata hali sawa na mazungumzo ya ana kwa ana.

Ili uanze, nenda katika mipangilio ya Faragha kisha uchague ‘Muda Chaguomsingi wa Ujumbe’. Unaweza kupata maelezo zaidi hapa.

WhatsApp ilibuniwa kwa kuzingatia wazo rahisi: unachoshiriki na familia na marafiki zako hakifai kutoka nje. Miaka mitano iliyopita, tuliongeza ufumbaji wa mwisho hadi mwisho. Kufikia sasa kipengele hicho hulinda zaidi ya ujumbe bilioni 100 kila siku wakati wa mawasiliano kati ya zaidi ya watumiaji bilioni 2.

Ingawa ujumbe uliofumbwa mwisho hadi mwisho unaotuma au kupokea huhifadhiwa kwenye kifaa chako, watu wengi pia wanataka mbinu ya kuhifadhi nakala za soga zao ili kuzipata endapo watapoteza simu zao. Kuanzia leo, tunazindua safu ya ziada ya hiari ya usalama ili kulinda kwa ufumbaji wa mwisho hadi mwisho, nakala za soga unazohifadhi kwenye Hifadhi ya Google au iCloud. Hakuna huduma nyingine ya mawasiliano ya ngazi ya ulimwengu inatoa kiwango hiki cha usalama kwa ujumbe, maudhui, ujumbe wa sauti, simu za video na nakala za soga za watumiaji.

Sasa unaweza kulinda nakala zako za soga zilizofumbwa mwisho hadi mwisho ukitumia nenosiri utakalojitungia au ufunguo wa usimbaji wenye tarakimu 64 ambao ni wewe pekee unaujua. WhatsApp wala mtoa huduma wako wa kuhifadhi nakala hawataweza kusoma nakala zako wala kufikia ufunguo unaohitajika kuzifungua.

Huku tukiwa na zaidi ya watumiaji bilioni 2, ni furaha yetu kuwapa watu chaguo zaidi za kulinda faragha yao. Tutazindua kipengele hiki polepole kwa watumiaji walio na toleo jipya zaidi la WhatsApp. Maelezo zaidi kuhusu jinsi unavyoweza kulinda nakala zako kwa ufumbaji wa mwisho hadi mwisho kwenye iOS na Android yanaweza kupatikana hapa, pia maelezo zaidi kuhusu jinsi tulivyobuni kipengele hiki yapo hapa.

Ni wewe unayemiliki ujumbe wako wa WhatsApp. Ndiyo maana ujumbe wako binafsi wa WhatsApp hulindwa kwa ufumbaji wa mwisho hadi mwisho na ndiyo maana tunatoa njia za kufanya ujumbe utoweke kiotomatiki kutoka kwenye soga zako.

Mojawapo ya vipengele ambavyo tumeombwa sana ni kuwa na uwezo wa kuhamisha historia ya soga zako kutoka kwenye mfumo mmoja wa uendeshaji kwenda kwenye mwingine unapobadili simu. Tumefanya kazi kwa bidii kwa ushirikiano na watengenezaji wa mifumo ya uendeshaji na vifaa ili kubuni njia salama na ya uhakika.

Tunafurahi kuzindua uwezo wa kuhamisha historia yako ya WhatsApp kutoka kwenye iOS kwenda kwenye Android. Hili hufanyika bila ujumbe wako kutumwa kwenda kwa WhatsApp katika mchakato unaojumuisha ujumbe wa sauti, picha na video. Ili kuanza, kipengele hiki kinapatikana kwenye vifaa vya Samsung vinavyotumia Android 10 au matoleo ya baadaye na kitapatikana kwenye vifaa zaidi vya Android hivi karibuni.

Unapoweka mipangilio kwenye kifaa kipya, utapewa chaguo la kuhamisha soga zako kwa usalama kutoka kwenye kifaa chako cha zamani kwenda kwenye kifaa kipya. Mchakato huu unahitaji kebo ya USB-C ambayo upande mmoja unaunganisha vifaa vya Apple (Lightning). Unaweza kupata maelezo zaidi hapa.

Huu ni mwanzo tu. Tunatazamia kufanya chaguo hili lipatikane kwa watu wengi zaidi ili waweze kuhamia kwenye mifumo wanayopenda na kwenda na soga zao kwa usalama.

Ingawa kupiga picha na kurekodi video kwa simu zetu kumekuwa sehemu kubwa ya maisha yetu, si kila kitu tunachoshiriki kinafaa kuwa kumbukumbu ya kudumu ya kidijitali. Katika simu nyingi, ukipiga picha itachukua nafasi na kukaa katika hifadhi ya kamera yako daima.

Hii ndiyo sababu leo tunazindua picha na video za Kutazama Mara Moja ambazo zitatoweka kwenye soga baada ya kufunguliwa, hivyo kuwapa watumiaji uwezo zaidi wa kudhibiti faragha yao.

Kwa mfano, unaweza kutuma picha ya Kutazama Mara Moja ya nguo mpya unazojipima dukani, kutoa maoni ya haraka kuhusu jambo fulani, au taarifa fulani nyeti kama vile nenosiri la Wi-Fi.

Sawa na ujumbe mwingine wa binafsi unaotuma kwenye WhatsApp, maudhui ya Kutazama Mara Moja hufumbwa mwisho hadi mwisho kwa hivyo WhatsApp haiwezi kuyaona. Pia yatawekewa alama bayana ya aikoni ya “mara moja”.

Baada ya maudhui kutazamwa, ujumbe utaonekana ukiwa na neno “imefunguliwa” ili kuepusha mkanganyiko kuhusu kilichokuwa kikifanyika kwenye soga wakati wa maudhui hayo kutoweka.

Tunazindua kipengele hiki kwa kila mtu kuanzia wiki hii na tunatazamia kupata maoni kuhusu njia hii mpya ya kutuma maudhui ya faragha na yanayotoweka.

Unaweza kusoma zaidi kuhusu jinsi ya kukijaribu hapa.

Katika kipindi ambapo wengi wetu tuko mbalimbali, hakuna kitu kizuri zaidi ya kujumuika na ndugu na marafiki katika simu ya kikundi. Pia hakuna kitu kibaya kama kutambua kwamba umekosa fursa hiyo adimu.

Jinsi umaarufu wa simu za vikundi unavyoendelea kukua, tumekuwa tukiboresha hali ya utumiaji kwa watumiaji wetu, huku pia tukiendelea kutoa usalama na faragha kupitia ufumbaji wa mwisho hadi mwisho.

Leo, tunaongeza uwezo wa kujiunga na simu ya kikundi, hata baada ya simu hiyo kuanza. Uwezo wa kujiunga na simu ikiwa tayari imeanza unaondoa ulazima wa kujibu simu ya kikundi pindi inapoanza. Hali hii inaleta haraka na urahisi kama wa mazungumzo ya ana kwa ana katika simu za vikundi kwenye WhatsApp.

Wakati mwingine mazungumzo mazuri zaidi hufanyika usipoyatarajia. Sasa, ikiwa mtu katika kikundi chako amekosa kupokea simu ilipopigwa, bado anaweza kujiunga wakati wowote anapopenda. Pia unaweza kuondoka kwenye simu na kujiunga tena wakati wowote mradi simu bado inaendelea.

Pia tumebuni skrini ya maelezo ya simu ili uweze kuona ni nani tayari amejiunga na nani amealikwa lakini bado hajajiunga. Kadhalika, ukigusa ‘puuza’ unaweza kujiunga baadaye kutoka kwenye kichupo cha simu kwenye WhatsApp.

Kipengele cha simu unazoweza kujiunga nazo kinazinduliwa leo na tunataraji kwamba watu wataanza kufurahia hali hii mpya.

Unaweza kusoma zaidi kuhusu jinsi ya kuijaribu hapa.

We’re honored by the opportunity to support the U.S. government’s sprint to get more Americans vaccinated for COVID-19 before the July 4 holiday, or as soon as they are able to do so.

People of all backgrounds rely on WhatsApp, though we know WhatsApp plays a particularly strong role with Spanish speaking communities in the United States. This new Spanish-language vaccine finder the CDC developed makes it easy to find a location to get the shot, order a free ride to get there, and get information.

It’s amazing what can be done with just a simple text messaging service. Throughout the last year we’ve worked with over 150 governments and health organizations, like WHO and now the CDC, to help counter misinformation, provide updates, and get people vaccinated to end this pandemic. Please help us spread the word to someone you know by tapping https://wa.me/18336361122?text=hola.

Localizador de vacunas de los CDC en WhatsApp disponible en español

Es un honor para nosotros tener la oportunidad de apoyar al gobierno de Estados Unidos en su carrera por lograr que una mayor parte de la ciudadanía se vacune contra el COVID-19 antes de la celebración del 4 de julio, o tan pronto como les sea posible.

Si bien personas de todos los orígenes confían en WhatsApp, sabemos que esta aplicación juega un papel particularmente importante en la comunidad hispanohablante de Estados Unidos. Con el nuevo localizador de vacunas que desarrollaron los Centros para el Control y la Prevención de Enfermedades (CDC, por sus siglas en inglés) y que está disponible en español, será más fácil buscar un lugar donde vacunarse, solicitar un traslado gratuito al centro de vacunación y recibir información.

Es increíble lo que se puede lograr con un simple servicio de mensajería de texto. Durante el último año, trabajamos con más de 150 gobiernos y organizaciones de salud, como la Organización Mundial de la Salud (OMS) y ahora los CDC, para ayudar a contrarrestar la desinformación, ofrecer actualizaciones y lograr que las personas se vacunen para terminar con esta pandemia. Por favor, visita el siguiente enlace y ayúdanos a difundir el mensaje entre tus contactos: https://wa.me/18336361122?text=hola.

Huku watu wengi wakigeukia kupiga soga na biashara kwenye WhatsApp, leo katika F8 Refresh tunatangaza masasisho kwenye API ya WhatsApp Business, ambayo yatafanya iwe rahisi kwa biashara kuanza kutumia, na watu kupiga soga kwa urahisi na biashara hizo.

Anza Kutumia WhatsApp kwa Haraka

Tumepunguza muda ambao inachukua biashara kuanza kutumia kutoka wiki kadhaa hadi dakika tano tu. Iwe biashara inataka kufanya kazi na watoa huduma za biashara au kupata usaidizi wa moja kwa moja kutoka Facebook siku za usoni, uboreshaji huu utazirahisishia biashara za wastani na kubwa kuwa na mazungumzo na wateja kwenye WhatsApp.

Pokea Taarifa za Ziada kutoka kwenye Biashara

Kwa vile biashara nyingi zinaingia katika WhatsApp, tunaboresha jinsi biashara zinavyoweza kuwasiliana na wateja wao. Kwa mfano, biashara zingeweza tu kutuma arifa kwa wakati, hali iliyofanya iwe vigumu kuwasiliana na wateja nje ya kipindi cha saa 24. Kwa hivyo sasa tutawezesha aina zaidi za mawasiliano -- kwa mfano, ili kuwajulisha watu wakati bidhaa iliyokwisha inapatikana tena. Pia tumeshuhudia jinsi arifa za mara kwa mara kutoka kwa mamlaka za afya kuhusu jinsi ya kukabili janga la sasa zimekuwa muhimu, na tunataka kufanya huduma kama hizo zipatikane kwenye aina nyingi za mawasiliano.

Jibu Biashara katika Njia Mpya

Pia tunaanzisha vipengele vipya vya utumaji ujumbe ambavyo vinaweza kuwasaidia watu kufanya biashara kwa haraka zaidi. Ujumbe mpya wa orodha unatoa menyu ya hadi machaguo 10 kwa hivyo si lazima tena watu waandike jibu. Vitufe vya kujibu vitawaruhusu watu kuchagua kwa urahisi miongoni mwa machaguo matatu kwa kubofya tu kile ambacho biashara zinaweza kuweka mapema kupitia akaunti zao za API ya WhatsApp Business.

Kama kawaida, watu wataendelea kudhibiti soga zao. Bado watu wanatakiwa kuanzisha mazungumzo au kuomba biashara ziwasiliane nao kupitia WhatsApp. Pamoja na masasisho haya, tunawapa watu njia mpya za kutoa maoni zaidi kuhusu hali yao ya utumiaji ilivyokuwa ikiwa wana sababu ya kuzuia biashara fulani.

Tunataka WhatsApp iwe njia bora na ya binafsi zaidi ya mawasiliano kati ya watu na biashara, tunafurahia sana hali hizi mpya tunazobuni ili kuboresha mawasiliano ya kibiashara.

WhatsApp inafahari kuzindua kifurushi kipya cha vibandiko kwa ushirikiano na Shirika la Afya Duniani (WHO) kinachoitwa “Vaccines for All.” Tunataraji kwamba vibandiko hivi vitawapa watu njia bunifu na ya kupendeza ya kuwasiliana na kueleza furaha, utulivu na matumaini wanayohisi kwa faragha kwa kuzingatia yanayowezekana kutokana na chanjo ya COVID-19 pamoja na kuonyesha shukrani zao kwa wahudumu wa afya ambao wameendelea na ushujaa wa kuokoa maisha katika kipindi hiki kirefu kigumu.

Tangu kuanza kwa janga hili, tumeshirikiana na zaidi ya mashirika 150 ya kitaifa, majimbo na serikali za mitaa, pamoja na mashirika kama vile WHO na UNICEF kutoa huduma za COVID-19 kwa njia ya simu ili kuwaunganisha zaidi ya watumiaji bilioni 2 na taarifa na nyenzo sahihi. Zaidi ya ujumbe bilioni 3 umetumwa kupitia nambari hizi za huduma kote duniani katika mwaka uliopita.

Kwa vile janga linaingia katika awamu mpya katika mataifa mengi, serikali zinatumia nambari hizi za huduma kwa simu ili kuwaunganisha raia na taarifa sahihi za chanjo na usajili kwa njia ya faragha katika mataifa kama vile Indonesia, Afrika Kusini, Argentina, Brazil na India. Nchini Indonesia, wafanyakazi 500,000 wa afya walijisajili kwa miadi yao ya chanjo kupitia huduma hii katika siku 5 za kwanza.

Tunataka kusaidia serikali na mashirika ya kimataifa kuwaunganisha watu wengi kote duniani na taarifa na huduma za chanjo kadri inavyowezekana, hasa katika maeneo yaliyo magumu kufikia au miongoni mwa makundi ya waliotengwa. Pia tumeondoa matozo yanayotokana na utumaji wa ujumbe kupitia API ya WhatsApp Business.

Tunapoendelea polepole kurejelea utangamano wa ana kwa ana katika baadhi ya nchi, tunataraji kwamba watu wataendelea kushiriki mawazo na hisia zao za faragha - pamoja na matumaini - na ndugu na marafiki zao wa karibu kwenye WhatsApp.

Kifurushi cha vibandiko vya “Vaccines for All” sasa kinapatikana kwenye WhatsApp.

Ni fahari yetu kukutangazia kwamba njia salama na ya faragha ya kupiga simu za sauti na video kati ya mtu na mwingine sasa inapatikana kwenye programu ya WhatsApp kwenye kompyuta.

Katika mwaka uliopita, tumeshuhudia ongezeko la watu wanaopigiana simu kwenye WhatsApp, aghalabu kwa mazungumzo ya muda mrefu. Katika Mkesha wa Mwaka Mpya mwaka jana, tulivunja rekodi kwa kuwa na simu bilioni 1.4 za sauti na video zilizopigwa katika siku moja pekee. Huku kukiwa na idadi kubwa ya watu ambao bado wapo mbali na wapendwa wao na kuendelea kuzoelea njia mpya za kufanya kazi, tunataka mazungumzo kwenye WhatsApp yahisi kana kwamba ni ya ana kwa ana kadiri iwezekanavyo, bila kujali mahali ulipo ulimwenguni au ni teknolojia gani unatumia.

Kupokea simu katika skrini kubwa kunarahisisha kufanya kazi na wafanyakazi wenzako, kuwaona wanafamilia kwa ubora zaidi kwenye kiwambo kikubwa, au kukuruhusu kutumia mikono yako kufanya vitu vingine wakati unazungumza. Ili kufanya upigaji simu kwenye kompyuta uwe na manufaa zaidi, tumehakikisha kwamba inafanya kazi vizuri katika mkao wima au mlazo, inaonekana kwenye kidirisha huru kinachoweza kubadili ukubwa wake kwenye skrini ya kompyuta yako, na ambacho kitakuwa katika sehemu ya juu ya skrini kila wakati ili usipoteze soga zako za video kwenye kichupo cha kivinjari au katika madirisha uliyofungua.

Simu za sauti na video kwenye WhatsApp hufumbwa mwisho hadi mwisho, kwa hivyo WhatsApp haiwezi kuzisikia au kuziona, iwe unapiga kutoka kwenye simu au kompyuta yako. Tunaanza kwa simu za mtu na mwenzake katika programu ya WhatsApp kwenye kompyuta ili kuhakikisha kwamba tunakupa huduma ya hali ya juu. Tutapanua kipengele hiki ili kujumuisha simu za sauti na za video kwa ajili ya vikundi katika siku zijazo.

Ni matarajio yetu kwamba watu watafurahia kuwapigia ndugu na marafiki zao simu kwa njia salama na ya faragha kwenye kompyuta. Unaweza kusoma zaidi, ikiwa ni pamoja na jinsi ya kupakua programu ya kompyuta kwa ajili ya Windows na Mac hapa.

Leo tunashiriki mipango iliyosasishwa kuhusu jinsi tutakavyowaomba watumiaji wa WhatsApp kuhakiki masharti yetu ya huduma na sera ya faragha. Hapo awali tulikabiliana na kiasi kikubwa cha taarifa zisizofaa kuhusu sasisho hili na tunazidi kujitahidi ili kuondoa mkanganyiko wowote.

Kumbuka, tunatengeneza njia mpya za kuwasiliana au kununua katika biashara zilizo kwenye WhatsApp, ni hiari kabisa kutumia njia hizo. Ujumbe wa binafsi utaendelea kufumbwa mwisho hadi mwisho kila wakati, kumaanisha kwamba WhatsApp haiwezi kusikia au kuusoma.

Tumetafakari kuhusu kile tungefanya kwa njia tofauti. Tungependa kila mtu ajue historia yetu ya kutetea ufumbaji wa mwisho hadi mwisho na aamini kwamba tumejitolea kulinda faragha na usalama wa watu. Sasa tunatumia sehemu ya Hali kushiriki maadili na masasisho yetu moja kwa moja kwenye WhatsApp. Tutafanya zaidi ili kuhakikisha kwamba tunaeleweka vizuri siku za usoni.

Katika wiki chache zijazo, tutaonyesha bango kwenye WhatsApp likiwa na maelezo zaidi ambayo watu wanaweza kuyasoma kwa wakati wao wenyewe. Pia tumejumuisha maelezo zaidi ili kujaribu kushughulikia baadhi ya madukuduku ambayo tunayasikia. Hatimaye, tutaanza kuwakumbusha watu wakague na kukubali masasisho haya ili waweze kuendelea kutumia WhatsApp.

Pia tunadhani ni muhimu kwa watu kujua jinsi tunavyoweza kutoa huduma za WhatsApp bila malipo. Kila siku, mamilioni ya watu huanzisha soga ya WhatsApp ili kuwasiliana na biashara kwa sababu ni rahisi zaidi ya kupiga simu au kuandikiana barua pepe. Tunatoza biashara ili ziweze kutoa huduma kwa wateja kwenye WhatsApp - hatutozi watu. Baadhi ya vipengele vya ununuzi huhusisha Facebook ili biashara ziweze kudhibiti orodha zao za bidhaa kwenye programu hizi. Tunaonyesha maelezo zaidi moja kwa moja kwenye WhatsApp ili watu waweze kuchagua ikiwa wanataka kuingiliana na biashara, au la.

Katika kipindi hiki, tunaelewa kwamba baadhi ya watu wanaweza kuangalia programu nyingine zilivyo. Tumeshuhudia baadhi ya washindani wetu wakijaribu kudai kwamba hawawezi kuona mawasiliano ya watu - ikiwa programu haina ufumbaji wa mwisho hadi mwisho kwa chaguomsingi, basi inaweza kusoma ujumbe wako. Baadhi ya programu zinadai kwamba ni bora kwa sababu zina taarifa chache ikilinganishwa na WhatsApp. Tunaamini kwamba watu wanataka programu ziwe salama na za uhakika, hata kama hilo linamaana kwamba WhatsApp itahitaji kiasi fulani cha data. Tunajitahidi kuwa waangalifu katika uamuzi tunaofanya na tutaendelea kubuni njia mpya za kutimiza majukumu haya kwa kutumia taarifa chache, si nyingi.

Tunamshukuru kwa dhati kila mtu ambaye ametusaidia kushughulikia changamoto hizi na bado tupo tayari kujibu maswali yoyote. Hatujaacha kubuni kwa ajili ya 2021 na tunatarajia tutakuwa na mengi ya kushiriki katika wiki na miezi ijayo.