فی الحال، WhatsApp پیغامات اکثر ہمارے فونز پر مستقل طور پر محفوظ رہتے ہیں۔ اگرچہ دوستوں اور خاندان کی یادوں کو سنبھال کر رکھنا بہت اچھا ہے، لیکن ہم جو بھی بھیجتے ہیں اس میں سے زیادہ تر کو مستقل طور پر موجود رہنے کی ضرورت نہیں ہوتی۔

ہمارا ہدف ہے کہ WhatsApp پر کی گئی بات چیت کو ممکنہ حد تک شخصی طور پر کی گئی بات چیت جیسا بنایا جائے، جس کا مطلب ہے کہ ان کا ہمیشہ کے لیے موجود رہنا ضروری نہیں ہے۔ اسی لیے ہم WhatsApp پر غائب ہونے والے پیغامات کو استعمال کرنے کا آپشن متعارف کرانے کے حوالے سے پرجوش ہیں۔

غائب ہونے والے پیغامات کے آن ہونے پر چیٹ میں بھیجے گئے نئے پیغامات 7 دن کے بعد غائب ہو جائیں گے، جس سے پیغامات کم نظر آئيں گے اور زیادہ نجی ہوں گے۔ آپس میں ہونے والی براہ راست چیٹ میں، کوئی شخص بھی غائب ہونے والے پیغامات آن یا آف کر سکتا ہے۔ گروپس میں، کنٹرول ایڈمنز کے پاس ہو گا۔

ہم 7 دن کے ساتھ شروعات کر رہے ہیں کیونکہ ہمیں لگتا ہے کہ آلات پر بات چیت کے ہمیشہ نہ رہنے سے بھی سکون ملتا ہے اور یہ عملی بھی ہے کیونکہ آپ کس بارے میں بات چیت کر رہے تھے وہ بھولیں گے بھی نہیں۔ آپ کو کچھ دن پہلے موصول ہونے والی شاپنگ لسٹ یا اسٹور کا پتہ آپ کی ضرورت کے وقت تک موجود رہیں گے، اور پھر یہ غائب ہو جائیں گے جب آپ کو ان کی ضرورت نہیں ہو گی۔ غائب ہونے والے پیغامات کو فعال کرنے کا طریقہ اور مزید تفصیلات آپ یہاں پڑھ سکتے ہیں۔

ہم امید کرتے ہیں کہ لوگ غائب ہونے والے پیغامات سے لطف اندوز ہوں گے، جو اس مہینے سے دنیا بھر کے صارفین کے لیے دستیاب ہوں گے۔

ہم نے دیکھا ہے کہ گزشتہ کچھ سالوں میں ذاتی بات چیت کیلئے لوگوں کا رجحان پیغام رسانی کی ایپس کی طرف بہت زیادہ ہوا ہے اور لوگوں کی بڑھتی ہوئی تعداد کاروباری مقاصد کیلئے بھی WhatsApp پر انحصار کر رہی ہے۔

ایسے کئی پرانے طریقے جن کے ذریعے لوگ اور کاروبار بات چیت کرتے ہیں وہ اب کارآمد نہیں رہے۔ اگرچہ کاروبار فون کالز، ای میلز اور SMS کا نظم کرنے کیلئے سالانہ اربوں ڈالر خرچ کرتے ہیں لیکن لوگوں کو یہ پسند نہیں ہے کہ انہیں ہولڈ پر رہ کر انتظار کرنا پڑے، ان کی درخواستیں ایک شخص سے دوسرے کو منتقل کی جائيں یا پھر وہ اس فکر میں رہیں کہ ان کے پیغامات موصول ہوئے ہیں یا نہیں۔

عالمی وبا نے یہ واضح کر دیا ہے کہ کاروباروں کو اپنے کسٹمرز کو سروس فراہم کرنے اور سیل کرنے میں کامیاب ہونے کیلئے تیز اور مؤثر طریقوں کی ضرورت ہے۔ WhatsApp ایسے وقت میں ایک آسان اور باسہولت ذریعہ بن گيا ہے۔ 135 ملین سے زیادہ لوگ روزانہ WhatsApp Business اکاؤنٹ پر پیغام بھیجتے ہیں۔ ہماری تحقیق بتاتی ہے کہ لوگ مدد حاصل کرنے کیلئے کاروبار کو پیغام بھیجنا زیادہ پسند کرتے ہیں اور خریداری کرنا ممکن ہو تو اس کے امکانات بھی زیادہ ہوتے ہیں۔

تاہم ہمیں ابھی بہت کچھ بنانے کی ضرورت ہے۔ گزشتہ دو سالوں میں، ہم نے WhatsApp Business ایپ اور WhatsApp Business API فراہم کی ہیں تاکہ چھوٹے بڑے ہر طرح کے کاروبار اپنی چیٹس کا نظم کر سکیں۔ ہم نے اس حوالے سے تاثرات کو بغور سنا ہے کہ کیا چیزیں کارآمد ثابت ہوئی ہیں اور ہمارا ماننا ہے کہ WhatsApp کسٹمرز اور کاروباروں کے مابین رابطہ قائم کرنے کیلئے پیغام رسانی کو بہترین طریقہ بنانے میں مدد کر سکتا ہے۔ اس مقصد کیلئے ہم مندرجہ ذیل شعبوں میں اپنی سرمایہ کاری بڑھا رہے ہیں:

• خریداری - ہم لوگوں کیلئے دستیاب پروڈکٹس دیکھنے اور چیٹ میں ہی خرید پانے کے طریقوں میں اضافہ کریں گے۔ ہم کاروباروں کیلئے ان خصوصیات کو ان کے موجودہ کامرس اور کسٹمر سلوشنز میں ضم کرنا بھی آسان بنانا چاہتے ہیں۔ اس سے ایسے کئی چھوٹے کاروباروں کو مدد ملے گی جو ان حالات میں سب سے زیادہ متاثر ہوئے ہیں۔
• Facebook کی ہوسٹنگ سروسز - کاروباروں کی ٹیکنالوجی کے حوالے سے مختلف ضروریات ہوتی ہیں اور جن کمپنیوں کے ساتھ وہ کام کرتے ہیں ان میں وہ کسٹمر کی مواصلات ہوسٹ کرنے اور نظم کرنے کا اختیار چاہتے ہیں، خاص طور پر دور سے کام کرنے کے رجحان میں اضافہ کی وجہ سے اس کی ضرورت بڑھ گئی ہے۔ یہی وجہ ہے کہ آنے والے مہینوں میں ہمارا ارادہ ہے کہ ان کاروباری سلوشن کے فراہم کنندگان کے ساتھ اپنی پارٹنرشپس میں اضافہ کیا جائے جن کے ساتھ ہم گزشتہ دو سال سے کام کر رہے ہیں۔ ہم کاروباروں کو ہوسٹنگ سروسز کے ذریعے اپنے WhatsApp پیغامات کا نظم کرنے کا نیا آپشن بھی دیں گے جو Facebook فراہم کرنے کا ارادہ رکھتا ہے۔ اس آپشن کی مدد سے چھوٹے اور متوسط کاروباروں کے لیے شروع کرنا، پروڈکٹس فروخت کرنا، اپنی انوینٹری اپ ٹو ڈیٹ رکھنا اور موصول ہونے والے پیغامات کا فوراً جواب دینا زیادہ آسان ہو جائے گا، چاہے ان کے ملازمین کہیں پر بھی ہوں۔
• کاروباری سیلز - ہم اپنی فراہم کردہ کچھ سروسز کیلئے کاروباری کسٹمرز کو چارج کریں گے جس سے WhatsApp کو مسلسل اپنا کاروبار بڑھانے میں مدد ملے گی اور اس کے ساتھ ہم دو ارب سے زیادہ لوگوں کو شروع سے آخر تک مرموز مفت ٹیکسٹ، ویڈیو اور وائس کالنگ فراہم کرتے رہیں گے اور اپنی ان مفت سروسز میں توسیع جاری رکھیں گے۔

ہم جانتے ہیں کہ اب بھی زیادہ تر لوگ WhatsApp کو بس اپنے دوستوں اور فیملی سے ہی بات چیت کرنے کیلئے استعمال کریں گے، یہی وجہ ہے کہ ہم نئی شاندار خصوصیات بنانا اور لوگوں کی نجی گفتگو کی حفاظت کرنا جاری رکھیں گے۔

ہمارا ماننا ہے کہ WhatsApp پر یہ اضافی تجربات بہت سے لوگوں اور کاروباروں کی اصل ضرورت کو پورا کرتے ہیں چاہے وہ قریب میں ہی موجود ہوں یا دنیا کے کسی دوسرے کونے میں۔ ہم مستقبل کیلئے پُرجوش ہیں اور آنے والے مہینوں میں ان سروسز کو بتدریج متعارف کروائیں گے۔

چیٹس میں شیئر کیے گئے متعدد بار فارورڈ شدہ پیغامات کے لیے، WhatsApp ایک خصوصی فارورڈ شدہ لیبل فراہم کرتا ہے۔ ان دو تیر کے نشانات سے لوگوں کو یہ جاننے میں مدد ملتی ہے کہ ان کو موصول ہونے والا پیغام قریبی رابطے کا لکھا ہوا نہیں ہے۔ انہیں ایک وقت میں زیادہ سے زیادہ بار بھیجے جانے کی تعداد کے حوالے سے ہم نے اس سال کے شروع میں حدود سیٹ کی تھیں تاکہ WhatsApp کی نجی نوعیت کو برقرار رکھا جا سکے۔

آج ہم ایک سادہ طریقہ آزمائشی طور پر متعارف کروا رہے ہیں تاکہ ان پیغامات کو چیٹ میں موجود بڑا کرنے کے شیشہ نما گلاس (محدب عدسے) کے بٹن کو ٹیپ کر کے دوبارہ چیک کیا جا سکے۔ متعدد بار فارورڈ کیے گئے پیغامات کو تلاش کرنے کے ایک سادہ طریقے کی فراہمی لوگوں کو خبروں کے نتائج یا ان کو موصول ہونے والے مواد کے بارے میں معلومات کے دیگر ذرائع تلاش کرنے میں مدد فراہم کر سکتی ہے۔

اس خصوصیت کے کام کرنے کا طریقہ یہ ہے کہ صارفین براؤزر کے ذریعے پیغام کو اپ لوڈ کر سکتے ہیں اور WhatsApp اس پیغام کو کبھی نہیں دیکھتا۔

'انٹرنیٹ پر تلاش کریں' کو برازیل، اٹلی، آئرلینڈ، میکسیکو، اسپین، برطانیہ، اور امریکہ میں WhatsApp کے Android‏، iOS اور WhatsApp ویب کے تازہ ترین ورژنز کے لیے آج سے متعارف کروایا جا رہا ہے۔

جیسا کہ دنیا بھر میں کاروبار دوبارہ کھلنے اور اپنی آن لائن موجودگی کو وسیع کرنے کی تیاریاں کر رہے ہیں، لوگوں کو سوالات پوچھنے، معلومات حاصل کرنے یا کوئی ایسی چیز تلاش کرنے کیلئے جسے وہ ممکنہ طور پر خریدنا چاہیں، کاروباروں کے ساتھ رابطہ کرنے کے آسان طریقے چاہئیں۔

آج ہم 50 ملین سے زیادہ WhatsApp Business ایپ صارفین کو سپورٹ کرتے ہیں۔ دریافت ہو پانے میں ان کی اور WhatsApp Business API پر موجود ہزاروں بڑے کاروباروں کی مدد کرنے کے لیے ہم نئی خصوصیات متعارف کروا رہے ہیں تاکہ WhatsApp پر کاروبار کے ساتھ چیٹ شروع کی جا سکے اور دیکھا جا سکے کہ وہ کون سی اشیاء اور سروسز فراہم کر رہے ہیں۔

QR‎ کوڈز کے ذریعے کاروبار کے ساتھ چیٹ شروع کرنا

QR‎ کوڈز ڈیجیٹل دروازے کے مانند ہیں جن سے کسی کاروبار کے ساتھ انتہائی آسانی سے چیٹ شروع کی جا سکتی ہے۔ پہلے جب لوگوں کی نظر سے کوئی دلچسپ کاروبار گزرتا تھا تو انہیں اس کا WhatsApp نمبر، ایک وقت میں ایک ہی نمبر درج کر کے اپنے روابط میں شامل کرنا پڑتا تھا۔ اب، لوگ کسی کاروبار کے اسٹور فرنٹ، پروڈکٹ پیکجنگ یا رسید پر نظر آنے والا QR کوڈ اسکین کر کے اس کے ساتھ چیٹ شروع کر سکتے ہیں۔

مثال کے طور پر، Uttam Toys، جو راجکوٹ، بھارت میں کھلونوں کا ایک اسٹور ہے جس نے یہ خصوصیت ٹیسٹ کرنے میں ہماری مدد کی ہے، اپنی پروڈکٹ پیکجنگ اور کھلونوں کے مینوئلز پر QR کوڈز لگائے گا تاکہ کسٹمرز سوالات پوچھنے کے لیے آسانی سے رابطہ کر سکیں۔

QR‎ کوڈ اسکین کرنے سے چیٹ کھل جائے گی جس میں آپشنل پہلے سے پُر شدہ پیغام ہوگا جسے کاروبار نے چیٹ شروع کرنے کیلئے بنایا ہوگا۔ ایپ کے پیغام رسانی کے ٹولز کے ذریعے، کاروبار فوراً جواب میں معلومات جیسے کہ اپنا کیٹلاگ بھیج سکتے ہیں تاکہ گفتگو جاری رہے۔ QR‎ کوڈ کا استعمال شروع کرنے کیلئے، کاروبار یہ فوری مراحل فالو کر سکتے ہیں۔

QR‎ کوڈز آج سے دنیا بھر میں WhatsApp Business ایپ یا WhatsApp Business API استعمال کرنے والے کاروباروں کے لیے دستیاب ہیں۔

کاروبار کیا فراہم کرتا ہے یہ دریافت کرنے کے لیے کیٹلاگ شیئر کرنے کی سہولت

کیٹلاگز کاروباروں کو اپنی فراہم کردہ اشیاء اور سروسز دکھانے اور شیئر کرنے کی سہولت دیتے ہیں جس کی وجہ سے انہیں زیادہ فروخت کرنے میں مدد مل سکتی ہے۔ گزشتہ سال لانچ کرنے کے بعد سے، کیٹلاگز لوگوں کے لیے کاروبار کے ساتھ WhatsApp پر رابطہ کرنے کا ایک مقبول طریقہ بن چکے ہیں۔ در حققیت، WhatsApp پر ہر مہینے 40 ملین سے زائد لوگ کاروبار کا کیٹلاگ دیکھتے ہیں۔

لوگوں کیلئے پروڈکٹس دریافت کرنا آسان بنانے کیلئے ہم کیٹلاگز اور انفرادی آئٹمز کو ویب سائٹس، Facebook‏، Instagram اور دیگر جگہوں پر لنک کے بطور شیئر کرنے کیلئے دستیاب بنا رہے ہیں۔ اور اگر لوگ اپنا تلاش کردہ کیٹلاگ یا آئٹم دوستوں یا فیملی کے ساتھ شیئر کرنا چاہیں تو وہ بس لنک کاپی کر کے اسے WhatsApp پر اور دیگر جگہوں پر بھی بھیج سکتے ہیں۔

کیٹلاگ لنکس پوری دنیا میں دستیاب ہیں اور کاروبار انہیں شیئر کرنے کا طریقہ یہاں جان سکتے ہیں۔

اگرچہ دنیا کی نئی صورتحال کے مطابق ڈھلنے کا یہ سفر کاروباروں کیلئے طویل اور مشکل ہوگا لیکن ہم انہیں سپورٹ فراہم کرنے کے منتظر ہیں۔

دنیا بھر کے 2 ارب سے زائد لوگ پہلے سے ہی WhatsApp کو پسند اور استعمال کر رہے ہیں۔ اگرچہ ہماری توجہ اب بھی لوگوں کو دوستوں اور فیملی سے چیٹ کرنے کا سادہ، قابل اعتبار اور نجی طریقہ فراہم کرنے پر ہے۔ لیکن ہم یہ یقینی بنانے کے لیے اپنی پروڈکٹ کی ڈیزائن بہتر بنانے کا کام بھی جاری رکھے ہوئے ہیں کہ WhatsApp ہر کسی کے لیے، ہر جگہ رابطہ کرنے کے کارآمد ترین طریقے کے طور پر برقرار رہے۔

آج ہم اگلے چند ہفتوں میں دستیاب ہونے والی کچھ نئی خصوصیات کے متعارف کروائے جانے کی تصدیق کر کے خوشی محسوس کر رہے ہیں:

• اینیمیٹڈ اسٹیکرز: اسٹیکرز WhatsApp پر لوگوں کے مواصلت کرنے کے سب سے تیزی سے بڑھتے ہوئے طریقوں میں سے ایک ہیں جو روزانہ کروڑوں اور اربوں کی تعداد میں بھیجے جاتے ہیں۔ ہم نئے اینیمیٹڈ اسٹیکر پیکس متعارف کروا رہے ہیں جو پہلے سے بھی زیادہ پُرلطف اور معنی خیز ہیں۔
• QR‎ کوڈز: ہم نیا رابطہ شامل کرنا پہلے سے بھی زیادہ آسان بنا رہے ہیں۔ جلد ہی جب آپ کسی نئے شخص سے ملیں گے تو آپ انہیں اپنے روابط میں شامل کرنے کے لیے ان کا QR کوڈ اسکین کر پائیں گے۔ ان کے ہندسوں کو اب ایک ایک کر کے درج کرنے کی ضرورت نہیں ہے۔
• WhatsApp‎ ویب اور ڈیسک ٹاپ کیلئے ڈارک موڈ: بے حد مشہور ڈارک موڈ تھیم اب آپ کے کمپیوٹر کیلئے بھی دستیاب ہے۔
• گروپ ویڈیو کالز میں بہتریاں: اب ویڈیو کال میں 8 تک لوگوں کے شامل ہونے کی سہولت کے ساتھ، ہم نے آپ کیلئے اپنی مرضی کے کسی بھی ممبر پر فوکس کرنا آسان بنا دیا ہے۔ اپنی مرضی کے کسی بھی ممبر پر فوکس کرنے کیلئے اس کی ویڈیو کو دبا کر رکھیں اور وہ بڑی ہو کر پوری اسکرین پر آ جائے گی۔ ہم نے 8 یا اس سے کم افراد پر مشتمل گروپ چیٹس کے لیے ویڈیو آئیکن بھی شامل کیا ہے تاکہ آپ 1 ٹیپ کے ذریعے باآسانی گروپ ویڈیو شروع کر سکیں۔
• اسٹیٹس اب KaiOS پر بھی دستیاب ہے: KaiOS کے صارفین اب اس مشہور خصوصیت سے لطف اندوز ہو سکتے ہیں جو آپ کو 24 گھنٹے بعد غائب ہونے والی اسٹیٹس اپ ڈیٹس شیئر کرنے کی سہولت دیتی ہے۔

یہ خصوصیات اگلے چند ہفتوں میں WhatsApp کے تازہ ترین ورژنز میں صارفین کے لیے دستیاب بنائی جائیں گی۔

ہمیں یہ بتاتے ہوئے بے حد خوشی محسوس ہو رہی ہے کہ آج سے ہم برازیل میں موجود صارفین کیلئے WhatsApp میں ڈیجیٹل پیمنٹس کی خصوصیت متعارف کروا رہے ہیں۔ لوگ محفوظ طریقے سے رقم بھیج پائیں گے یا کسی مقامی کاروبار کے ساتھ چیٹ کے اندر ہی اس سے خریداری کر پائیں گے۔

10 ملین سے زائد چھوٹے اور مائیکرو کاروبار برازیل کی کمیونٹیز کیلئے دل کی دھڑکن کی مانند ہیں۔ سوالات کا جواب حاصل کرنے کیلئے کسی کاروبار کو فوری پیغام بھیجنا فطرت اور عادت کا حصہ بن چکا ہے۔ اب اسٹور کا کیٹلاگ دیکھنے کے ساتھ ساتھ کسٹمرز پروڈکٹس کیلئے پیمنٹس بھی بھیج پائیں گے۔ پیمنٹس کو آسان بنانا زیادہ کاروباروں کو ڈیجیٹل معیشت میں لانے اور ترقی کے نئے مواقع پیدا کرنے میں مدد کر سکتا ہے۔

اس کے علاوہ، ہم عزیز و اقارب کو رقم بھیجنا پیغام بھیجنے جتنا ہی آسان بنا رہے ہیں جو کہ اس وقت لوگوں کے جسمانی طور پر ایک دوسرے سے دور ہونے کی وجہ سے بے حد اہمیت کا حامل ہے۔ چونکہ WhatsApp پر پیمنٹس کو ٖFacebook Pay کی بدولت ممکن بنایا جاتا ہے لہذا ہم مستقبل میں لوگوں اور کاروباروں کیلئے Facebook کی تمام ایپس پر کارڈ کی ایک ہی معلومات استعمال کرنا ممکن بنانا چاہتے ہیں۔

ہم نے سیکیورٹی کو ذہن میں رکھ کر پیمنٹس کی یہ خصوصیت بنائی ہے اور بغیر اجازت والی ٹرانزیکشنز روکنے کیلئے ایک خصوصی چھ ہندسوں والا PIN یا فنگر پرنٹ درکار ہوگا۔ شروع میں، ہم Visa اور Mastercard نیٹ ورکس پر Banco do Brasil‏، Nubank اور Sicredi کے ڈیبٹ یا کریڈٹ کارڈز کی معاونت کریں گے، نیز ہم برازیل میں پیمنٹس کے نمایاں پروسیسر Cielo کے ساتھ کام کر رہے ہیں۔ ہم نے ایک اوپن ماڈل تیار کیا ہے تاکہ مستقبل میں مزید پارٹنرز شامل ہو سکیں۔

WhatsApp پر رقم بھیجنا یا خریداری کرنا لوگوں کیلئے مفت ہے۔ کاروبار کسٹمر کی پیمنٹس موصول کرنے کیلئے پروسیسنگ فیس ادا کریں گے، ویسے ہی جیسے وہ کریڈٹ کارڈ سے ٹرانزیکشن قبول کرتے وقت ممکنہ طور پر ادا کرتے ہیں۔

WhatsApp پر پیمنٹس کی خصوصیت آج سے برازیل میں لوگوں کیلئے دستیاب ہو رہی ہے اور ہم مستقبل قریب میں اسے سبھی کیلئے مہیا کرنے کی امید کرتے ہیں۔

عالمی وبا کووڈ-19 کی وجہ سے ہم میں سے کئی لوگ دوستوں اور فیملی سے دور ہیں۔ نتیجتاً، ہم یہ دیکھ رہے ہیں کہ دنیا بھر کے لوگ اب WhatsApp پر وائس اور ویڈیو کالنگ کا پہلے سے زیادہ استعمال کر رہے ہیں۔ بالخصوص گروپ کالنگ کارآمد رہی ہے اور ہمارے صارفین نے بیک وقت زیادہ لوگوں سے منسلک ہونے کی خواہش ظاہر کی ہے۔ آج سے، ہم ممبرز کی تعداد کو بڑھا کر 4 سے 8 یعنی دگنا کر رہے، جن کے ساتھ آپ بیک وقت WhatsApp ویڈیو یا وائس کال کر سکتے ہیں۔

گزشتہ ماہ سے، لوگ روزانہ WhatsApp کالز پر 15 بلین سے زائد منٹ باتیں کرتے ہوئے گزار رہے ہیں، جو عالمی وبا سے پہلے کسی عام دن سے کافی زیادہ ہے۔ اور تحریری پیغامات کی طرح ہی، وہ سبھی کالز شروع سے آخر تک مرموز کاری کے ذریعے محفوظ ہیں۔ ہم نے گروپ کالنگ کو اس طرح بنایا ہے کہ یہ سستے آلات استعمال کرنے اور سست رفتار نیٹ ورک کے حالات کا سامنا کرنے والے لوگوں سمیت صارفین کی زیادہ سے زیادہ ممکنہ تعداد کیلئے دستیاب ہو۔

ہم جانتے ہیں کہ لوگ گھر پر رہتے ہوئے رابطہ کرنے کے مختلف طریقوں کی خواہش کر سکتے ہیں، یہی وجہ ہے کہ ‏WhatsApp ‏Portal پر بھی دستیاب ہے جس کے بارے میں ہمیں بہت سے صارفین نے بتایا ہے کہ یہ قرنطینہ کے دوران فیملی کے ساتھ اپنا بیٹھک کا کمرہ شیئر کرنے کا بہترین طریقہ رہا ہے۔

WhatsApp کالز کی نئی اور زیادہ ممبرز کی تعداد کی سہولت سے فائدہ اٹھانے کیلئے کال کے سبھی ممبرز کو iPhone یا Android پر آج دستیاب WhatsApp کے تازہ ترین ورژن پر اپ ڈیٹ کرنا ہوگا۔ اسے آزمانے کیلئے اپنے دوستوں اور فیملی سے WhatsApp اپ ڈیٹ کرنے کو کہیں۔

ہر دن WhatsApp پر لاکھوں، کروڑوں اسٹیکرز بھیجے جاتے ہیں، جس کی مدد سے لوگ بنا کچھ لکھے اپنے نجی خیالات اور نظریات شیئر کرتے ہیں۔ 18 مہینے پہلے لانچ ہونے کے بعد سے اسٹیکرز لوگوں کے لیے WhatsApp پر بات چیت کرنے کے تیز ترین طریقوں میں سے اب ایک طریقہ ہو گیا ہے۔

ہم "گھر پر ساتھ" اسٹیکر پیک لانچ کرنے کے لیے عالمی ادارہ صحت WHO کے ساتھ کام کرنے کے لیے بہت پر جوش ہیں، جو کووڈ-19 عالمی وبا کے دوران اور اس کے بعد ایک دوسرے سے جڑے رہنے میں لوگوں کی مدد کرے گا۔ ایسے اسٹیکرز مزاحیہ، تعلیمی اور ہمہ گیر ہو سکتے ہیں، اور زبان، عمر اور دیگر حدود اور رکاوٹوں کو ختم کرتے ہیں۔

ہمیں امید ہے کہ لوگ اپنے دوست اور احباب، خاص طور پر وہ لوگ جو اکیلا پن محسوس کر رہے ہیں، اکیلے اور خوف زدہ ہیں، ان کے احوال جاننے اور انہیں اطمینان دلانے کے لیے ان اسٹیکرز کے استعمال سے لطف اندورز ہوں گے۔ اس پیک میں ہاتھ دھونے، دوری قائم رکھنے، ورزش کرنے اور بطور اہمیت میڈیکل ہیروز اور اپنی زندگی کے ذاتی ہیروز کی مدح کرنے کے لیے لوگوں کو یاد دلانے کے تخلیقی طریقے شامل ہیں۔

"گھر پر ساتھ" اسٹیکر پیک اب WhatsApp میں دستیاب ہے، جس میں درجہ ذیل 9 زبانوں کے لیے ترجمہ کردہ ٹیکسٹ بھی ہے - عربی، فرانسیسی، جرمن، انڈونیشیائی، اطالوی، پرتگالی، روسی، ہسپانوی اور ترک۔

ان حالات میں جبکہ کروڑوں لوگ کووڈ-19 کی وجہ سے اپنے دوستوں اور فیملی سے بذات خود ملاقات کرنے سے قاصر ہیں، لوگ مواصلت کیلئے WhatsApp پر پہلے سے بھی زیادہ انحصار کر رہے ہیں۔ اس بحران کے دوران لوگ WhatsApp کے ذریعے ڈاکٹرز، اساتذہ اور الگ تھلگ ہوئے اپنے پیاروں سے بات کر رہے ہیں۔ یہی وجہ ہے کہ WhatsApp پر آپ کے سبھی پیغامات اور کالز ڈیفالٹ طور پر شروع سے آخر تک رمزکاری کے ذریعے محفوظ ہیں تاکہ آپ کی نجی ترین گفتگو کیلئے محفوظ ذریعہ فراہم کیا جا سکے۔

پچھلے سال ہم نے صارفین کو کئی بار فارورڈ ہونے والے پیغامات کے نظریے سے متعارف کروایا۔ ان پیغامات پر دوہرے تیروں کا لیبل لگا ہوتا ہے تاکہ نشاندہی ہو سکے کہ ان کا ماخذ کوئی قریبی رابطہ نہیں ہے۔ درحقیقت، یہ پیغامات WhatsApp پر عموماً بھیجے جانے والے پیغامات کے مقابلے میں کم ذاتی نوعیت کے ہوتے ہیں۔ ہم اب حد متعارف کروا رہے ہیں تاکہ یہ پیغامات ایک وقت میں صرف ایک ہی چیٹ کو فارورڈ کیے جا سکیں۔

ذاتی پیغام رسانی کی سروس کے طور پر، ہم نے گزشتہ سالوں میں گفتگو کو رازداری میں رکھنے کیلئے کئی اقدامات کیے ہیں۔ مثال کے طور پر، ہم نے پہلے فارورڈ کیے جانے والے پیغامات پر حدود متعین کی تھی تاکہ غلط پیغامات کو وائرل ہونے سے روکا جائے۔ اور ہم نے دیکھا کہ عالمی پیمانے پر فارورڈ کیے جانے والے کل پیغامات میں 25 فیصد کمی آئی۔

کیا فارورڈ کرنا مکمل طور پر کوئی بُری چیز ہے؟ بالکل بھی نہیں۔ ہم جانتے ہیں کہ کئی صارفین مفید معلومات نیز مزاحیہ ویڈیوز، میمز اور فلسفے یا ایسی دعائیں فارورڈ کرتے ہیں جنہیں وہ اہم سمجھتے ہیں۔ حالیہ ہفتوں میں، لوگوں نے صف اول میں کام کرنے والے ہیلتھ ورکرز کو سپورٹ کرنے کیلئے عوامی لمحات منظم کرنے کی خاطر بھی WhatsApp استعمال کیا ہے۔ تاہم، ہم نے فارورڈ کرنے کی مقدار میں کافی زیادہ اضافہ دیکھا ہے جس کے بارے میں ہمارے صارفین کا کہنا ہے کہ یہ پریشان کُن محسوس ہو سکتا ہے اور غلط معلومات کے پھیلاؤ میں مدد کر سکتا ہے۔ ہمارا ماننا ہے کہ WhatsApp کو ذاتی گفتگوؤں کی جگہ کے طور پر برقرار رکھنے کیلئے ان پیغامات کے پھیلاؤ کی رفتار کم کرنا اہم ہے۔

اس تبدیلی کے علاوہ، ہم NGOs اور حکومتوں بشمول عالمی ادارہ صحت اور 20 سے زائد قومی صحت کی وزارتوں کے ساتھ براہ راست کام کر رہے ہیں تاکہ لوگوں کو درست معلومات سے منسلک کیا جا سکے۔ ان قابل بھروسہ حکام نے مل کر معلومات اور مشورے کی درخواست کرنے والے لوگوں کو براہ راست ہزاروں لاکھوں پیغامات بھیجے ہیں۔ آپ ان کوششوں کے بارے میں مزید معلومات، نیز ممکنہ افواہوں، جھانسوں اور من گھڑت باتوں کو حقائق چیک کرنے والی تنظیموں کو جمع کروانے کے طریقے کے بارے میں ہمارے کورونا وائرس سے متعلق معلوماتی مرکز پر جان سکتے ہیں۔

ہمارا ماننا ہے کہ لوگوں کو نجی طور پر ایک دوسرے سے جڑنے کی ضرورت اتنی زیادہ پہلے کبھی نہ تھی۔ ہماری ٹیمیں سخت محنت کر رہی ہیں تاکہ اس غیر معمولی عالمی بحران کے دوران بھی WhatsApp ہمیشہ کی طرح قابل اعتماد طور پر مسلسل چلتا رہے۔ ہم بدستور آپ کے تاثرات جاننا چاہیں گے اور لوگوں کیلئے WhatsApp پر ایک دوسرے کے ساتھ شیئر کرنے کے طریقے بہتر بنانا جاری رکھیں گے۔

ہم دنیا بھر کے اپنے صارفین کی طرف سے سب سے زیادہ درخواست کردہ خصوصیت “ڈارک موڈ” کے ساتھ WhatsApp کو اپ ڈیٹ کرنے پر بہت پر جوش ہیں۔

‎WhatsApp کا ڈارک موڈ پہلے جیسے تجربہ کے ساتھ بالکل نئی شکل میں ہے۔ اسے کم روشنی کے ماحول میں آنکھوں کا دباؤ کم کرنے کے لیے بنایا گیا ہے۔ اور ہمیں امید ہے کہ یہ ان نا پسند لمحات سے بچنے میں آپ کی مدد کرے گا جب آپ کے فون سے کمرے میں اجالا ہو جاتا ہو۔

ڈارک موڈ بناتے وقت ہم نے دو خاص چیزوں پر توجہ دیتے ہوئے ریسرچ اور تجربات کیے:

پڑھنے میں آسانی: رنگوں کا انتخاب کرتے وقت ہم چاہتے تھے کہ آنکھوں کی تھکن کم کی جا سکے اور ایسے رنگ کا استعمال کیا جا سکے جو iPhone اور Android پر سسٹم ڈیفالٹس کے قریب ہوں۔

معلومات کے نظام مراتب: ہم چاہتے تھے کہ صارفین آسانی سے ہر اسکرین پر اپنی توجہ مرکوز کر سکیں۔ ہم نے رنگ اور ڈیزائن کے دیگر عناصر کا استعمال کر کے ایسا کیا تاکہ یہ یقینی بنایا جا سکے کہ اہم ترین معلومات بالکل نمایاں ہو۔

Android 10‎ اور iOS 13 کے صارفین سسٹم کی ترتیبات میں ڈارک موڈ فعال کر کے اس کا استعمال کر سکتے ہیں۔ ‎Android 9 اور اس سے نیچے کا ورژن استعمال کرنے والے صارفین WhatsApp ترتیبات > چیٹس > تھیم میں جا کر ‘ڈارک’ منتخب کر سکتے ہیں۔

ہمیں امید ہے کہ ڈارک موڈ سے تمام لوگ لطف اٹھا سکیں گے۔ ڈارک موڈ آنے والے دنوں میں WhatsApp کے تازہ ترین ورژن پر دستیاب ہونے والا ہے۔