زیادہ سے زیادہ افراد کے WhatsApp پر کاروباروں کے ساتھ چیٹ کرنے کا انتخاب کرنے پر، آج F8 Refresh پر ہم WhatsApp Business API میں ایسی اپ ڈیٹس کا اعلان کر رہے ہیں جن سے کاروبار زیادہ تیزی سے آغاز کر سکیں گے اور لوگوں کیلئے ان کاروباروں کے ساتھ چیٹ کرنا آسان ہوجائے گا۔

WhatsApp پر زیادہ تیزی سے شروعات کریں

ہم نے کاروباروں کیلئے شروعات کرنے میں لگنے والے وقت کو ہفتوں سے کم کر کے محض پانچ منٹ کر دیا ہے۔ چاہے کوئی کاروبار کسی کاروباری حل فراہم کرنے والے کے ساتھ کام کرنا چاہے یا مستقبل میں Facebook سے براہ راست سپورٹ حاصل کرنا چاہے، ان بہتریوں سے درمیانے اور بڑے زیادہ کاروباروں کے لئے صارفین سے WhatsApp پر گفتگو کرنا آسان ہوجائے گا۔

کاروباروں سے اضافی معلومات حاصل کریں

جیسے جیسے مزید کاروبار WhatsApp پر آ رہے ہیں، ہم اس بات میں بہتری لا رہے ہیں کہ کس طرح کاروبار اپنے صارفین سے بات چیت کرسکتے ہیں۔ مثال کے طور پر، کاروبار اکثر بروقت اطلاعات بھیجنے تک ہی محدود رہتے تھے، جس کی وجہ سے 24 گھنٹے بعد صارفین کے ساتھ فالو اپ کرنا مشکل ہوتا تھا۔ لہذا اب ہم پیغامات کی مزید اقسام کو سپورٹ کریں گے -- مثال کے طور پر، کسی چیز کے دوبارہ اسٹاک میں آ جانے پر لوگوں کو آگاہ کرنا۔ ہم نے یہ بھی دیکھا ہے کہ وبائی مرض کا جواب دینے سے متعلق ہیلتھ اتھارٹیز کی وقتاً فوقتاً اپ ڈیٹس کس طرح مدد گار رہی ہیں اور ہم اس نوعیت کی سروس کو گفتگو کی مزید اقسام کیلئے دستیاب بنانا چاہتے ہیں۔

نئے طریقوں سے کاروباروں کو جواب دیں

ہم میسجنگ کی نئی خصوصیات بھی فراہم کر رہے ہیں جن سے لوگوں کو اپنے کام زیادہ تیزی سے سرانجام دینے میں مدد مل سکتی ہے۔ نئے فہرست پیغامات میں 10 اختیارات تک کا ایک مینو ہوتا ہے تاکہ لوگوں کو کوئی جواب ٹائپ نہ کرنا پڑے۔ جواب والے بٹنوں سے لوگ ایک فوری ٹیپ کے ذریعے تین اختیارات میں سے ایک کا انتخاب تیزی سے کرسکیں گے جنہیں کوئی کاروبار اپنے WhatsApp Business API اکاؤنٹ کے ذریعے وقت سے پہلے سیٹ کر سکتا ہے۔

ہمیشہ کی طرح، لوگوں کو ان کی چیٹس پر کنٹرول حاصل رہتا ہے۔ لوگوں کو اب بھی گفتگو شروع کرنے یا کسی کاروبار کو اس بات کی درخواست کرنے کی ضرورت ہو گی کہ وہ WhatsApp کے ذریعے ان سے رابطہ کرے۔ ان اپ ڈیٹس کے ساتھ، اگر لوگوں کے پاس کسی کاروبار کو بلاک کرنے کی کوئی وجہ ہو تو ہم انہیں اپنے تجربے کے بارے میں زیادہ تاثرات فراہم کرنے کیلئے نئے طریقے بھی مہیا کر رہے ہیں۔

ہم چاہتے ہیں کہ WhatsApp لوگوں اور کاروباروں کیلئے ایک دوسرے سے منسلک ہونے کا سب سے آسان اور ذاتی طریقہ بنے، اور ہم ان نئے تجربات سے متعلق پرجوش ہیں جنہیں ہم کاروباری میسجنگ کو بہتر بنانے کیلئے تخلیق کررہے ہیں۔

WhatsApp کو ورلڈ ہیلتھ آرگنائزیشن (WHO) کے ساتھ مل کر ایک نئے ”Vaccines for All“ نامی اسٹیکر پیک کا اعلان کرنے پر فکر ہے۔ ہم امید کرتے ہیں کہ یہ اسٹیکر لوگوں کو ایک دوسرے سے منسلک ہونے اور نجی طور پر اپنی خوشی، راحت اور اس امید کا اظہار کرنے کا ایک تفریحی اور تخلیقی طریقہ فراہم کریں گے جو وہ ان امکانات کے بارے میں محسوس کرتے ہیں جو COVID-19 کی ویکسینز پیش کرتی ہیں، اور ان سے وہ ہیلتھ کیئر کے ان ہیروز کیلئے اپنی ستائش کا اظہار بھی کر سکیں گے جنہوں نے اس طویل اور مشکل وقت کے دوران زندگیاں بچانے کا اپنا کام جاری رکھا ہے۔

وبائی مرض کے آغاز سے ہی ہم نے اپنے 2 بلین صارفین کو درست معلومات اور وسائل فراہم کرنے کیلئے COVID-19 ہیلپ لائنز پر 150 سے زیادہ قومی، ریاستی اور مقامی حکومتوں اور WHO اور UNICEF جیسی تنظیموں کے ساتھ شراکت کی ہے۔ گزشتہ ایک سال میں ان عالمی ہیلپ لائنز پر 3 بلین سے زیادہ پیغامات بھیجے گئے ہیں۔

چونکہ وبائی مرض بہت سے ممالک میں ایک نئے مرحلے میں داخل ہو گیا ہے، انڈونیشیا، جنوبی افریقہ، ارجنٹائن، برازیل اور انڈیا جیسے ممالک میں حکومتیں شہریوں کو ویکسین اور رجسٹریشن سے متعلق درست معلومات نجی طور پر فراہم کرنے کیلئے ان ہیلپ لائنز کو استعمال کر رہی ہیں۔ انڈونیشیا میں 500,000 طبی کارکنوں نے ابتدائی 5 دنوں میں اس سروس پر اپنی ویکسین اپائنٹمنٹس کیلئے رجسٹر کیا۔

ہم حکومتوں اور بین الاقوامی تنظیموں کی دنیا بھر میں زیادہ سے زیادہ لوگوں کو ویکسین سے متعلق معلومات اور سروسز سے منسلک کرنے میں مدد کرنا چاہتے ہیں، خاص طور پر ایسے لوگ جو ایسے مقامات میں رہتے ہیں جہاں مشکل سے پہنچا جا سکتا ہے یا جن کا تعلق پسماندہ گروپس سے ہے۔ ہم نے وہ فیس بھی معاف کردی ہے جو ہماری WhatsApp Business API کے ذریعے پیغام بھیجنے سے اکٹھی ہوتی ہے۔

جیسا کہ ہم کچھ ممالک میں ذاتی طور پر ایک ساتھ اکٹھا ہونے کی طرف آہستگی سے گامزن ہیں، ہم امید کرتے ہیں کہ لوگ WhatsApp پر اپنے نجی خیالات اور تجربات اپنی فیملی اور قریبی دوستوں کے ساتھ شیئر کرتے رہیں گے۔

”Vaccines for All“ اسٹیکر پیک اب WhatsApp کے اندر ہی دستیاب ہے۔

ہمیں یہ اعلان کرتے ہوئے بے حد خوشی محسوس ہو رہی ہے کہ اب WhatsApp کی ڈیسک ٹاپ ایپ سے ایک دوسرے کو نجی اور محفوظ وائس اور ویڈیو کالز کی جا سکتی ہیں۔

گذشتہ سال کے دوران ہم نے WhatsApp پر لوگوں کی جانب سے ایک دوسرے کو کی جانے والی کالز میں نمایاں اضافہ دیکھا ہے، اور اکثر یہ کالز لمبی بات چیت کے لئے ہوتی ہیں۔ گزشتہ سال کے آخری روز ہم نے اب تک ایک دن میں کی جانے والی سب سے زیادہ کالز کا ریکارڈ توڑ دیا تھا۔ ایک ہی دن میں 1.4 ارب وائس اور ویڈیو کالز کی گئی تھیں۔ چونکہ بہت سے لوگ اپنوں سے دور ہیں، اور کام کرنے کے نئے طریقوں کے مطابق خود کو ایڈجسٹ کرنے کی کوشش کر رہے ہیں، ہم چاہتے ہیں کہ WhatsApp پر ہونے والی بات چیت زیادہ سے زیادہ نجی اور ذاتی محسوس ہو، بھلے ہی آپ دنیا میں کہیں بھی ہوں یا کوئی بھی آلہ استعمال کر رہے ہوں۔

بڑی اسکرین پر کال کرنے سے ساتھ میں کام کرنے والوں کے ساتھ کام کرنا اور اپنی فیملی کو بڑے کینوس پر زیادہ واضح طور پر دیکھ پانا آسان ہو جاتا ہے، یا پھر ہاتھ میں موبائل لیے بغیر آپ کمرے میں چل پھر کر بھی بات کر سکتے ہیں۔ ڈیسک ٹاپ کالنگ کو مزید کار آمد بنانے کے لئے، ہم نے اس بات کو یقینی بنایا ہے کہ یہ لمبائی (پورٹریٹ) اور چوڑائی (لینڈ اسکیپ) کی دونوں سمتوں پر ہی بلا رکاوٹ کام کرے، آپ کی کمپیوٹر اسکرین پر ایک علیحدہ ونڈو میں ظاہر ہو جس کی سائز تبدیل کی جا سکے، اور ہمیشہ اوپر رہے تاکہ ایک براؤزر ٹیب میں یا متعدد کھلی ونڈوز میں بھی آپ کی ویڈیو کال ہمیشہ چلتی رہے۔

WhatsApp پر وائس اور ویڈیو کالز شروع سے آخر تک انکرپشن کے ذریعے محفوظ (اینڈ سے اینڈ انکرپٹڈ) ہوتی ہیں، لہٰذا WhatsApp انہیں نہ سن سکتا ہے اور نہ ہی دیکھ سکتا ہے، چاہے آپ اپنے فون سے کال کریں یا اپنے کمپیوٹر سے۔ ہم WhatsApp ڈیسک ٹاپ ایپ پر ایک دوسرے سے کال کرنے کی سہولت کا آغاز کر رہے ہیں تاکہ ہم آپ کو ایک قابل اعتماد اور اعلیٰ معیار کا تجربہ فراہم کر سکیں۔ ہم مستقبل میں اس فیچر میں گروپ وائس اور ویڈیو کالز بھی متعارف کرائیں گے۔

ہمیں امید ہے کہ لوگ اپنے دوستوں اور فیملی کے ساتھ نجی اور محفوظ ڈیسک ٹاپ کالنگ سے لطف اندوز ہوں گے۔ آپ Windows PC اور Mac پر ڈیسک ٹاپ ایپ ڈاؤن لوڈ کرنے کے طریقے سمیت، مزید معلومات یہاں دیکھ سکتے ہیں۔

آج ہم اس حوالے سے اپ ڈیٹ کردہ منصوبے شیئر کر رہے ہیں کہ ہم کیسے WhatsApp کے صارفین سے ہماری سروس کی شرطیں اور پرائیویسی پالیسی پڑھنے کے لیے کہیں گے۔ اس اپ ڈیٹ کے بارے میں ہمیں پہلے بہت زیادہ غلط معلومات کا سامنا کرنا پڑا اور ہم مسلسل ہر طرح کی غلط فہمی دور کرنے کیلئے کڑی محنت کر رہے ہیں۔

آپ کو یاد دلاتے چلیں کہ ہم WhatsApp پر کاروباروں کے ساتھ چیٹ یا خریداری کرنے کے لیے ایسے نئے طریقے بنا رہے ہیں جن کا استعمال مکمل طور پر آپ کی مرضی پر منحصر ہے۔ ذاتی پیغامات ہمیشہ شروع سے آخر تک انکرپشن کے ذریعے محفوظ رہیں گے، اسلئے WhatsApp انہیں پڑھ یا سن نہیں سکتا۔

ہم نے اس بارے میں غور و فکر کیا ہے کہ ہم کیا چیزیں بہتر کر سکتے ہیں۔ ہم چاہتے ہیں کہ ہر کسی کو معلوم ہو کہ ہم نے شروع سے آخر تک انکرپشن کی ٹیکنالوجی کی حفاظت اور دفاع کے لیے کیا کیا ہے اور یہ اعتماد ہو کہ ہم لوگوں کی پرائیویسی اور سیکیورٹی کی حفاظت کے لیے کتنی ذمہ داری اور سنجیدگی سے کام لیتے ہیں۔ ہم اب اپنے اسٹیٹس فیچر کے ذریعے اپنی اقدار اور اصول اور اپ ڈیٹس براہ راست WhatsApp میں شیئر کر رہے ہیں۔ ہم آئندہ اپنی بات مزید واضح انداز میں پہنچانے کیلئے کئی مختلف اقدامات لیں گے۔

آنے والے ہفتوں میں ہم WhatsApp میں ایک بینر دکھائیں گے جو لوگوں کو مزید معلومات فراہم کرے گا اور لوگ اسے اپنی سہولت اور وقت کے مطابق پڑھ پائیں گے۔ ہم نے گردش کرنے والی تشویشات دور کرنے کی کوشش کرنے کیلئے مزید معلومات بھی شامل کی ہیں۔ اور آخر میں، ہم لوگوں کو WhatsApp کا استعمال جاری رکھنے کیلئے یہ اپ ڈیٹس پڑھنے اور قبول کرنے کے بارے میں نوٹیفیکیشن بھیجنا شروع کر دیں گے۔

ہمارے خیال میں لوگوں کو یہ بتانا بھی اہم ہے کہ ہم WhatsApp مفت کیسے فراہم کر پاتے ہیں۔ روزانہ لاکھوں لوگ کسی نہ کسی کاروبار کے ساتھ WhatsApp پر بات کرتے ہیں کیونکہ ایسا کرنا فون کال یا ای میل کرنے سے زیادہ آسان ہے۔ ہم WhatsApp پر کسٹمر سروس فراہم کرنے کیلئے کاروباروں سے معاوضہ لیتے ہیں، نہ کہ لوگوں سے۔ خریداری کے کچھ فیچرز میں Facebook بھی شامل ہے تاکہ کاروبار سبھی ایپس پر اپنی انوینٹری کا نظم کر سکیں۔ ہم مزید معلومات براہ راست WhatsApp میں ہی دکھاتے ہیں تاکہ لوگ خود اس بات کا فیصلہ کر سکیں کہ وہ کاروباروں کے ساتھ بات چیت کرنا چاہتے ہیں یا نہیں۔

ہم سمجھتے ہیں کہ اس دوران کچھ لوگ یہ دیکھنے کیلئے دوسری ایپس چیک کر سکتے ہیں کہ وہ کیا فراہم کر رہی ہیں۔ ہم نے اپنے کچھ حریفوں کو یہ دعوی کرتے دیکھا ہے کہ وہ لوگوں کے پیغامات نہیں دیکھ سکتے، لیکن اگر کوئی ایپ ڈیفالٹ طور پر شروع سے آخر تک انکرپشن فراہم نہیں کرتی تو اس کا مطلب ہے کہ وہ آپ کے پیغامات پڑھ سکتی ہے۔ دیگر ایپس دعوی کرتی ہیں کہ وہ اس لیے بہتر ہیں کیونکہ ان کے پاس WhatsApp سے بھی کم معلومات ہوتی ہیں۔ ہمارا ماننا ہے کہ لوگ ایسی ایپس تلاش کرتے ہیں جو قابل اعتماد اور محفوظ دونوں ہوں، چاہے اس کیلئے WhatsApp کو کچھ محدود ڈیٹا حاصل کرنے کی ضرورت ہو۔ ہم مکمل غور و فکر اور سنجیدگی کے ساتھ فیصلے لیتے ہیں اور ہم زیادہ نہیں، کم ہی معلومات کے ساتھ ان ذمہ داریوں کو پورا کرنے کے نئے طریقے بناتے رہیں گے۔

ہم ان سبھی لوگوں کے بے حد شکرگزار ہیں جنہوں نے ان تشویشات کو دور کرنے میں ہماری مدد کی اور سوالات کا جواب دینے کیلئے پیش پیش رہتے ہیں۔ ہم نے 2021 کیلئے نئی چیزیں بنانا بند نہیں کیا ہے اور آنے والے ہفتوں اور مہینوں میں مزید اپ ڈیٹس شیئر کرنے کے منتظر ہیں۔

ہمیں بہت سارے لوگوں سے یہ معلوم ہوا ہے کہ ہمارے نئے اپ ڈیٹ کے بارے میں لوگ بہت زیادہ غلط فہمیوں کا شکار ہیں۔ فکر اور تشویش پیدا کرنے والی بہت سی غلط معلومات اور افواہیں گردش کر رہی ہیں۔ لہذا ہم اپنے اصول اور ضابطے اور سچائی جاننے میں سب کی مدد کرنا چاہتے ہیں۔

WhatsApp کو ایک نہایت آسان آئیڈیا کی بنیاد پر بنایا گیا ہے اور وہ یہ کہ آپ اپنے دوستوں اور فیملی کے ساتھ جو بھی شیئر کرتے ہیں وہ آپ ہی کے درمیان رہتا ہے۔ اس کا مطلب یہ ہے کہ ہم شروع سے آخر تک مرموز کاری (اینڈ ٹو اینڈ انکرپشن) کے ذریعے ہمیشہ آپ کی ذاتی بات چیت کی حفاظت کرتے ہیں اور کریں گے، لہذا WhatsApp ہو یا Facebook، کوئی بھی آپ کے نجی پیغامات کو نہیں دیکھ سکتا۔ یہی وجہ ہے کہ ہم یہ ریکارڈز اپنے پاس نہیں رکھتے کہ کون کسے پیغام بھیج رہا ہے یا کال کر رہا ہے۔ WhatsApp آپ کا شیئر کیا گيا مقام بھی نہیں دیکھ سکتا اور نہ ہی Facebook کے ساتھ آپ کے رابطے شیئر کرتا ہے۔

ان اپ ڈیٹس سے ان میں سے کچھ بھی تبدیل نہیں ہو رہا ہے۔ بلکہ اس اپ ڈیٹ میں ایسے نئے آپشنز شامل ہیں جو WhatsApp پر کسی کاروبار کو پیغام بھیجنے کیلئے لوگوں کے پاس ہوں گے اور یہ اپ ڈیٹ ہمارے ڈیٹا حاصل کرنے اور استعمال کرنے کے بارے میں مزید شفافیت فراہم کرتا ہے۔ اگرچہ فی الحال ہر کوئی WhatsApp پر کاروبار سے خریداری نہیں کرتا ہے لیکن ہمارا ماننا ہے کہ آنے والے دنوں میں زیادہ لوگ WhatsApp پر خریداری کریں گے، لہذا لوگوں کا ان سروسز سے واقف ہونا اہم ہے۔ یہ اپ ڈیٹ Facebook کے ساتھ ڈیٹا شیئر کرنے کی ہماری قابلیت میں اضافہ نہیں کرتا ہے۔

اس صورتحال کے پیش نظر، ہم اب لوگوں کے لیے سروس کی شرطوں کو پڑھنے اور قبول کرنے کی تاریخ آگے بڑھا رہے ہیں۔ کسی کا بھی اکاؤنٹ 8 فروری کو معطل یا ڈیلیٹ نہیں ہوگا۔ اس دوران ہم WhatsApp کی رازداری، پرائیویسی اور سیکیورٹی کے بارے میں پھیلی غلط معلومات اور افواہوں کو رد اور ختم کرنے کیلئے اور بھی بہت کچھ کرنے جا رہے ہیں۔ اس کے بعد ہم 15 مئی کو نئے کاروباری آپشنز دستیاب ہونے سے پہلے لوگوں سے آہستہ آہستہ ان کی اپنی سہولت کے مطابق پالیسی پڑھنے کو کہیں گے۔

WhatsApp نے دنیا بھر کے لوگوں کو شروع سے آخر تک مرموز کاری (اینڈ ٹو اینڈ انکرپشن) کی سہولت فراہم کرنے میں مدد کی ہے اور ہم اب بھی اور آئندہ کیلئے بھی حفاظت اور سیکیورٹی کی اس ٹیکنالوجی کے دفاع کیلئے پُرعزم ہیں۔ ہم ان سبھی لوگوں کا شکریہ ادا کرنا چاہتے ہیں جنہوں نے ہم سے رابطہ کیا اور ان بہت سارے لوگوں کا بھی جنہوں نے سچائی پھیلانے میں اور افواہوں کو روکنے میں مدد کی۔ ہم WhatsApp کو نجی طور پر بات چیت کرنے کا بہترین ذریعہ بنانے کیلئے اپنی بھرپور کوشش جاری رکھیں گے۔

WhatsApp تیزی سے ایک اسٹور کاؤنٹر بن رہا ہے جہاں پروڈکٹس کے حوالے سے بات چیت کی جا رہی ہے اور سیلز کا عمل انجام دیا جا رہا ہے۔ کیٹلاگز کی وجہ سے لوگ فوراً دیکھ سکتے ہیں کہ کیا کچھ دستیاب ہے اور کاروبار مخصوص آئٹمز کے حوالے سے اپنی چیٹس کو منظم کر سکتے ہیں۔ چیٹس کے ذریعے خریداری کے بڑھتے ہوئے رجحان کو مد ںظر رکھتے ہوئے، ہم خرید و فروخت کو اور بھی آسان بنانا چاہتے ہیں۔

ہمیں یہ بتاتے ہوئے بے حد خوشی محسوس ہو رہی ہے کہ آج سے ہم WhatsApp میں کارٹس متعارف کروا رہے ہیں۔ کارٹس مقامی ریسٹورنٹ یا کپڑے کے اسٹور جیسے ان کاروباروں کے ساتھ پیغام رسانی کے لیے انتہائی کارآمد ہیں جو عام طور پر ایک وقت میں متعدد آئٹمز فروخت کرتے ہیں۔ کارٹس کے ذریعے، لوگ کیٹلاگ براؤز کر سکتے ہیں، متعدد پروڈکٹس کا انتخاب کر سکتے ہیں اور کاروبار کو ایک پیغام کے طور پر آرڈر بھیج سکتے ہیں۔ اس سے کاروباروں کے لیے آرڈر کی انکوائریوں کو ٹریک کرنا، کسٹمرز کی درخواستوں کا نظم کرنا اور سیلز مکمل کرنا آسان ہو جائے گا۔

مثلاً، راجکوٹ، بھارت میں کھلونے بیچنے والے ایک اسٹور Uttam Toys کو خصوصیت تک ابتدائی رسائی فراہم کی گئی اور انہوں نے ہمیں بتایا کہ کارٹس کی مدد سے کس طرح بار بار بات چیت کیے بغیر یہ آسانی سے معلوم ہو جاتا ہے کہ کسٹمر کیا آرڈر کر رہا ہے۔

کارٹس استعمال کرنا آسان ہے۔ بس اپنی پسند کے آئٹمز تلاش کریں اور 'کارٹ میں شامل کریں' پر ٹیپ کریں۔ جب آپ کارٹ میں آئٹمز شامل کر لیں تو کاروبار کو پیغام کے طور پر اسے بھیجیں۔ کارٹس استعمال کرنے کے حوالے سے مزید تفصیلات یہاں حاصل کی جا سکتی ہیں۔

کارٹس آج سے دنیا بھر میں دستیاب ہوں گے یعنی چھٹیوں کے موسم کیلئے بالکل درست وقت پر۔ WhatsApp پر خریداری سے لطف اندرز ہوں!

آج سے پورے بھارت میں لوگ WhatsApp کے ذریعے پیسے بھیج سکیں گے۔ WhatsApp‎ کی پیمنٹس خصوصیت سے پیسے بھیجنا پیغام بھیجنے جتنا ہی آسان اور محفوظ ہے۔ لوگ دور سے ہی باآسانی کسی فیملی ممبر کو پیسے بھیج سکتے ہیں یا اشیاء کی مل جل کر پیمنٹ کر سکتے ہیں۔ اس کیلئے ذاتی طور پر نقدی کا تبادلہ کرنے یا مقامی بینک جانے کی ضرورت نہیں ہے۔

‏WhatsApp‎ نے نیشنل پیمنٹس کارپوریشن آف انڈیا (NPCI) کے ساتھ پارٹنرشپ میں یونیفائیڈ پیمنٹ انٹرفیس ‏(UPI‏)‏ کے ذریعے اپنی پیمنٹس کی خصوصیت تیار کی ہے جو بھارت کا پہلا، ری‏ئل ٹائم پیمنٹ کا سسٹم ہے، اور یہ 160 سے زائد تعاون یافتہ بینکس کے ساتھ ٹرانزیکشنز کی سہولت دیتا ہے۔ ہم بھارت کی ڈیجیٹل پیمنٹس کو مزید آسان بنانے اور ان کے استعمال کو فروغ دینے کی اس تحریک میں شامل ہونے پر پرجوش ہیں، جو بھارت میں مالی شمولیت بڑھانے میں مدد کر رہی ہے۔

بھارت میں WhatsApp پر پیسے بھیجنے کیلئے، بھارت میں بینک اکاؤنٹ اور ڈیبٹ کارڈ ہونا ضروری ہے۔ WhatsApp بینکوں کو، جنہیں پیمنٹ سروس فراہم کنندگان بھی کہا جاتا ہے، ہدایات بھیجتا ہے جو کہ UPI کے ذریعے بھیجنے والے اور موصول کرنے والے بینکوں کے بیچ پیسے ٹرانسفر کرتے ہیں۔ ہمیں بے حد خوشی ہے کہ ہم بھارت کے پانچ بڑے بینکوں کے ساتھ کام کر رہے ہیں: State Bank of India ،Axis Bank ،HDFC Bank ،ICICI Bank، اور Jio Payments Bank۔ لوگ UPI کی تعاون یافتہ ایپ کے ذریعے کسی کو بھی WhatsApp پر پیسے بھیج سکتے ہیں۔

ہمارا ماننا ہے کہ آنے والے وقتوں میں WhatsApp اور UPI کی منفرد ساخت کا امتزاج مقامی تنظیموں کو دور حاضر کے کچھ اہم مسائل حل کرنے میں مدد کر سکتا ہے، بشمول ڈیجیٹل معیشت میں دیہی علاقوں کی شرکت میں اضافہ کرنا اور ان لوگوں کو مالی سروسز فراہم کرنا جن کے پاس پہلے کبھی رسائی نہیں رہی۔

‏WhatsApp کی دیگر تمام خصوصیات ہی کی طرح پیمنٹس خصوصیت کو، ہر پیمنٹ کیلئے ایک ذاتی UPI PIN درج کرنے سمیت، سیکیورٹی اور رازداری کے بنیادی اور اہم اصول کے تحت ڈیزائن کیا گیا ہے۔ WhatsApp پر پیمنٹس اب iPhone اور Android ایپ کا تازہ ترین ورژن استعمال کرنے والے لوگوں کیلئے دستیاب ہے۔

فی الحال، WhatsApp پیغامات اکثر ہمارے فونز پر مستقل طور پر محفوظ رہتے ہیں۔ اگرچہ دوستوں اور خاندان کی یادوں کو سنبھال کر رکھنا بہت اچھا ہے، لیکن ہم جو بھی بھیجتے ہیں اس میں سے زیادہ تر کو مستقل طور پر موجود رہنے کی ضرورت نہیں ہوتی۔

ہمارا ہدف ہے کہ WhatsApp پر کی گئی بات چیت کو ممکنہ حد تک شخصی طور پر کی گئی بات چیت جیسا بنایا جائے، جس کا مطلب ہے کہ ان کا ہمیشہ کے لیے موجود رہنا ضروری نہیں ہے۔ اسی لیے ہم WhatsApp پر غائب ہونے والے پیغامات کو استعمال کرنے کا آپشن متعارف کرانے کے حوالے سے پرجوش ہیں۔

غائب ہونے والے پیغامات کے آن ہونے پر چیٹ میں بھیجے گئے نئے پیغامات 7 دن کے بعد غائب ہو جائیں گے، جس سے پیغامات کم نظر آئيں گے اور زیادہ نجی ہوں گے۔ آپس میں ہونے والی براہ راست چیٹ میں، کوئی شخص بھی غائب ہونے والے پیغامات آن یا آف کر سکتا ہے۔ گروپس میں، کنٹرول ایڈمنز کے پاس ہو گا۔

ہم 7 دن کے ساتھ شروعات کر رہے ہیں کیونکہ ہمیں لگتا ہے کہ آلات پر بات چیت کے ہمیشہ نہ رہنے سے بھی سکون ملتا ہے اور یہ عملی بھی ہے کیونکہ آپ کس بارے میں بات چیت کر رہے تھے وہ بھولیں گے بھی نہیں۔ آپ کو کچھ دن پہلے موصول ہونے والی شاپنگ لسٹ یا اسٹور کا پتہ آپ کی ضرورت کے وقت تک موجود رہیں گے، اور پھر یہ غائب ہو جائیں گے جب آپ کو ان کی ضرورت نہیں ہو گی۔ غائب ہونے والے پیغامات کو فعال کرنے کا طریقہ اور مزید تفصیلات آپ یہاں پڑھ سکتے ہیں۔

ہم امید کرتے ہیں کہ لوگ غائب ہونے والے پیغامات سے لطف اندوز ہوں گے، جو اس مہینے سے دنیا بھر کے صارفین کے لیے دستیاب ہوں گے۔

ہم نے دیکھا ہے کہ گزشتہ کچھ سالوں میں ذاتی بات چیت کیلئے لوگوں کا رجحان پیغام رسانی کی ایپس کی طرف بہت زیادہ ہوا ہے اور لوگوں کی بڑھتی ہوئی تعداد کاروباری مقاصد کیلئے بھی WhatsApp پر انحصار کر رہی ہے۔

ایسے کئی پرانے طریقے جن کے ذریعے لوگ اور کاروبار بات چیت کرتے ہیں وہ اب کارآمد نہیں رہے۔ اگرچہ کاروبار فون کالز، ای میلز اور SMS کا نظم کرنے کیلئے سالانہ اربوں ڈالر خرچ کرتے ہیں لیکن لوگوں کو یہ پسند نہیں ہے کہ انہیں ہولڈ پر رہ کر انتظار کرنا پڑے، ان کی درخواستیں ایک شخص سے دوسرے کو منتقل کی جائيں یا پھر وہ اس فکر میں رہیں کہ ان کے پیغامات موصول ہوئے ہیں یا نہیں۔

عالمی وبا نے یہ واضح کر دیا ہے کہ کاروباروں کو اپنے کسٹمرز کو سروس فراہم کرنے اور سیل کرنے میں کامیاب ہونے کیلئے تیز اور مؤثر طریقوں کی ضرورت ہے۔ WhatsApp ایسے وقت میں ایک آسان اور باسہولت ذریعہ بن گيا ہے۔ 135 ملین سے زیادہ لوگ روزانہ WhatsApp Business اکاؤنٹ پر پیغام بھیجتے ہیں۔ ہماری تحقیق بتاتی ہے کہ لوگ مدد حاصل کرنے کیلئے کاروبار کو پیغام بھیجنا زیادہ پسند کرتے ہیں اور خریداری کرنا ممکن ہو تو اس کے امکانات بھی زیادہ ہوتے ہیں۔

تاہم ہمیں ابھی بہت کچھ بنانے کی ضرورت ہے۔ گزشتہ دو سالوں میں، ہم نے WhatsApp Business ایپ اور WhatsApp Business API فراہم کی ہیں تاکہ چھوٹے بڑے ہر طرح کے کاروبار اپنی چیٹس کا نظم کر سکیں۔ ہم نے اس حوالے سے تاثرات کو بغور سنا ہے کہ کیا چیزیں کارآمد ثابت ہوئی ہیں اور ہمارا ماننا ہے کہ WhatsApp کسٹمرز اور کاروباروں کے مابین رابطہ قائم کرنے کیلئے پیغام رسانی کو بہترین طریقہ بنانے میں مدد کر سکتا ہے۔ اس مقصد کیلئے ہم مندرجہ ذیل شعبوں میں اپنی سرمایہ کاری بڑھا رہے ہیں:

• خریداری - ہم لوگوں کیلئے دستیاب پروڈکٹس دیکھنے اور چیٹ میں ہی خرید پانے کے طریقوں میں اضافہ کریں گے۔ ہم کاروباروں کیلئے ان خصوصیات کو ان کے موجودہ کامرس اور کسٹمر سلوشنز میں ضم کرنا بھی آسان بنانا چاہتے ہیں۔ اس سے ایسے کئی چھوٹے کاروباروں کو مدد ملے گی جو ان حالات میں سب سے زیادہ متاثر ہوئے ہیں۔
• Facebook کی ہوسٹنگ سروسز - کاروباروں کی ٹیکنالوجی کے حوالے سے مختلف ضروریات ہوتی ہیں اور جن کمپنیوں کے ساتھ وہ کام کرتے ہیں ان میں وہ کسٹمر کی مواصلات ہوسٹ کرنے اور نظم کرنے کا اختیار چاہتے ہیں، خاص طور پر دور سے کام کرنے کے رجحان میں اضافہ کی وجہ سے اس کی ضرورت بڑھ گئی ہے۔ یہی وجہ ہے کہ آنے والے مہینوں میں ہمارا ارادہ ہے کہ ان کاروباری سلوشن کے فراہم کنندگان کے ساتھ اپنی پارٹنرشپس میں اضافہ کیا جائے جن کے ساتھ ہم گزشتہ دو سال سے کام کر رہے ہیں۔ ہم کاروباروں کو ہوسٹنگ سروسز کے ذریعے اپنے WhatsApp پیغامات کا نظم کرنے کا نیا آپشن بھی دیں گے جو Facebook فراہم کرنے کا ارادہ رکھتا ہے۔ اس آپشن کی مدد سے چھوٹے اور متوسط کاروباروں کے لیے شروع کرنا، پروڈکٹس فروخت کرنا، اپنی انوینٹری اپ ٹو ڈیٹ رکھنا اور موصول ہونے والے پیغامات کا فوراً جواب دینا زیادہ آسان ہو جائے گا، چاہے ان کے ملازمین کہیں پر بھی ہوں۔
• کاروباری سیلز - ہم اپنی فراہم کردہ کچھ سروسز کیلئے کاروباری کسٹمرز کو چارج کریں گے جس سے WhatsApp کو مسلسل اپنا کاروبار بڑھانے میں مدد ملے گی اور اس کے ساتھ ہم دو ارب سے زیادہ لوگوں کو شروع سے آخر تک مرموز مفت ٹیکسٹ، ویڈیو اور وائس کالنگ فراہم کرتے رہیں گے اور اپنی ان مفت سروسز میں توسیع جاری رکھیں گے۔

ہم جانتے ہیں کہ اب بھی زیادہ تر لوگ WhatsApp کو بس اپنے دوستوں اور فیملی سے ہی بات چیت کرنے کیلئے استعمال کریں گے، یہی وجہ ہے کہ ہم نئی شاندار خصوصیات بنانا اور لوگوں کی نجی گفتگو کی حفاظت کرنا جاری رکھیں گے۔

ہمارا ماننا ہے کہ WhatsApp پر یہ اضافی تجربات بہت سے لوگوں اور کاروباروں کی اصل ضرورت کو پورا کرتے ہیں چاہے وہ قریب میں ہی موجود ہوں یا دنیا کے کسی دوسرے کونے میں۔ ہم مستقبل کیلئے پُرجوش ہیں اور آنے والے مہینوں میں ان سروسز کو بتدریج متعارف کروائیں گے۔

چیٹس میں شیئر کیے گئے متعدد بار فارورڈ شدہ پیغامات کے لیے، WhatsApp ایک خصوصی فارورڈ شدہ لیبل فراہم کرتا ہے۔ ان دو تیر کے نشانات سے لوگوں کو یہ جاننے میں مدد ملتی ہے کہ ان کو موصول ہونے والا پیغام قریبی رابطے کا لکھا ہوا نہیں ہے۔ انہیں ایک وقت میں زیادہ سے زیادہ بار بھیجے جانے کی تعداد کے حوالے سے ہم نے اس سال کے شروع میں حدود سیٹ کی تھیں تاکہ WhatsApp کی نجی نوعیت کو برقرار رکھا جا سکے۔

آج ہم ایک سادہ طریقہ آزمائشی طور پر متعارف کروا رہے ہیں تاکہ ان پیغامات کو چیٹ میں موجود بڑا کرنے کے شیشہ نما گلاس (محدب عدسے) کے بٹن کو ٹیپ کر کے دوبارہ چیک کیا جا سکے۔ متعدد بار فارورڈ کیے گئے پیغامات کو تلاش کرنے کے ایک سادہ طریقے کی فراہمی لوگوں کو خبروں کے نتائج یا ان کو موصول ہونے والے مواد کے بارے میں معلومات کے دیگر ذرائع تلاش کرنے میں مدد فراہم کر سکتی ہے۔

اس خصوصیت کے کام کرنے کا طریقہ یہ ہے کہ صارفین براؤزر کے ذریعے پیغام کو اپ لوڈ کر سکتے ہیں اور WhatsApp اس پیغام کو کبھی نہیں دیکھتا۔

'انٹرنیٹ پر تلاش کریں' کو برازیل، اٹلی، آئرلینڈ، میکسیکو، اسپین، برطانیہ، اور امریکہ میں WhatsApp کے Android‏، iOS اور WhatsApp ویب کے تازہ ترین ورژنز کے لیے آج سے متعارف کروایا جا رہا ہے۔