आपल्या मनातील विचार आणि भावना एकही शब्द टाईप न करता व्यक्त करण्यासाठी दररोज WhatsApp वर कोट्यवधी स्टिकर्स पाठवले जातात. आम्ही दीड वर्षापूर्वी 'स्टिकर्स' हे फीचर आणले आणि तेव्हा पासून लोकांनी संवाद साधण्यासाठी सर्वाधिक पसंती असलेल्या माध्यमांमध्ये ते अग्रेसर आहे.

COVID-19 च्या या जागतिक साथीमध्ये मध्ये आम्ही WHO-जागतिक आरोग्य संस्थेबरोबर काम करुन "टुगेदर ॲट होम" हा स्टिकर पॅक आणला आहे. भाषा, वय आणि इतर सर्व मर्यादांच्या पलीकडे असलेली ही स्टिकर्स मजेशीर तर आहेतच पण ती शैक्षणिक आणि सर्वांना इतर कुठेही वापरता येतील अशी आहेत.

आम्हाला आशा आहे की आपल्या एकाकी असलेल्या किंवा चिंताग्रस्त जिवलग व्यक्तींना ही स्टिकर्स पाठवून त्यांच्या चेहऱ्यावर हसू आणण्यात तुम्हाला मदत होईल. या पॅकमध्ये विविध प्रकारे लोकांना हात धुण्याची आठवण करणे, सुरक्षित अंतर ठेवणे, व्यायाम करणे आणि महत्वाचे म्हणजे सध्या अहोरात्र कामामध्ये असलेल्या आपल्या वैद्यकीय क्षेत्रातील आणि इतर अनेक आधाडीवर मदत करणाऱ्या बंधुभगिनींचा आदर आणि सन्मान करण्यासाठी अनेक कलात्मक स्टिकर्सचा समावेश आहे.

"टुगेदर ॲट होम" हा स्टिकर पॅक आता WhatsApp वर उपलब्ध होत आहे. यामध्ये अरेबिक, फ्रेंच, जर्मन, इंडोनेशियन, इटालियन, पोर्तुगीज, रशियन, स्पॅनिश आणि टर्किश अशा नऊ भाषांमध्ये मजकूर उपलब्ध असेल.

COVID-19 मुळे कोट्यवधी माणसं त्यांच्या मित्रमैत्रिणी आणि कुटुंबियांना प्रत्यक्षात भेटू शकत नसल्यामुळे, आता एकमेकांशी संवाद साधण्यासाठी लोक WhatsApp वर पूर्वीपेक्षा जास्त विश्वास ठेवत आहेत. या संंकट प्रसंगी लोक WhatsApp द्वारे डॉक्टर्स, शिक्षण आणि विलगीकरण केलेल्या प्रियजनांशी बोलत आहेत. म्हणूनच सर्वाधिक वैयक्तिक संवाद साधण्यासाठी तुम्हाला एक सुरक्षित ठिकाण देण्याकरिता WhatsApp वरील तुमचे सर्व मेसेजेस आणि कॉल्स डिफॉल्टपणे एन्ड-टू-एन्ड एन्क्रिप्ट केले आहेत.

मागील वर्षी आम्ही वापरकर्त्यांसाठी "अनेक वेळा फॉरवर्ड केलेले मेसेजेस" ओळखण्याची संकल्पना आणली. हे मेसेजेस तुमच्या ओळखीच्या व्यक्तीने स्वतः तयार केलेले नसून ते त्यांना दुसऱ्याच कोणी पाठविलेले आहेत हे स्पष्ट दाखवण्यासाठी त्यावर दोन बाणांनी खूण केलेली आहे. याचा अर्थ असा की, हे मेसेजेस WhatsApp वर पाठवलेल्या सामान्य मेसेजेसच्या तुलनेत कमी वैयक्तिक असतात. आता आम्ही यावर मर्यादा आणणार आहोत म्हणजे हे मेसेजेस एकावेळी फक्त एका चॅटलाच फॉरवर्ड केले जाऊ शकतात.

खाजगी मेसेजिंग सेवा म्हणून, संवाद व्यक्तिगत ठेवण्यात मदत करण्यासाठी आम्ही मागील काही वर्षांमध्ये अनेक पावले उचलली आहेत. उदाहरणार्थ, व्हायरल मेसेजेस कमी वेगाने प्रसारित व्हावेत यासाठी यापूर्वी आम्ही फॉरवर्ड केल्या जाणाऱ्या मेसेजेसवर मर्यादा आणली. तेव्हा त्या वेळी जागतिकरित्या मेसेज फॉरवर्ड केले जाण्यात २५% घट आम्हाला दिसली.

फॉरवर्ड करणे ही वाईट गोष्ट आहे का? नक्कीच नाही. आम्हाला माहीत आहे की, अनेक वापरकर्ते उपयुक्त माहिती, तसेच मजेशीर व्हिडिओ, मेम्स, त्यांना अर्थपूर्ण वाटणारे विचार किंवा प्रार्थना फॉरवर्ड करतात. अलीकडील आठवड्यांमध्ये, अग्रभागी काम करणाऱ्या आरोग्य दक्षता कर्मचाऱ्यांना पाठिंबा देण्याकरिता ते कशी सेवा देतात याचे प्रत्यक्ष क्षण दाखवण्यासाठी देखील लोक WhatsApp वापरत आहेत. पण आजकाल आम्हाला मेसेजेस फॉरवर्ड केल्या जाण्याच्या प्रमाणात भरपूर वाढ झाल्याचे दिसत आहे, ज्याविषयी वापरकर्त्यांनी आम्हाला सांगितले आहे की असे मेसेज वाचून लोक भारावून जाऊ शकतात आणि ज्यामुळे चुकीची माहिती पसरवली जाऊ शकते. वैयक्तिक संवाद साधण्याचे एक ठिकाण म्हणून WhatsApp ला टिकवून ठेवण्यासाठी या मेसेजेसचे प्रसारण कमी करणे महत्त्वाचे असल्याचे आम्हाला वाटते.

या बदलाव्यतिरिक्त, लोकांना अचूक माहिती मिळवण्यात मदत करण्यासाठी आम्ही थेट सरकार आणि एनजीओंसह काम करत आहोत ज्यामध्ये "WHO-जागतिक आरोग्य संस्था" आणि २० पेक्षा जास्त राष्ट्रीय आरोग्य मंत्रालयांचा समावेश आहे. विश्वासू अधिकाऱ्यांनी एकत्र येऊन, ज्या लोकांनी माहितीसाठी विचारणा केली होती अशा लाखो लोकांना परस्पर थेट मेसेजेस पाठवले आहेत. तुम्ही या प्रयत्नांबद्दलची अधिक माहिती तसेच संभाव्य काल्पनिक कथा, फसवणूक करणारे मेसेजेस आणि अफवा हे "तथ्य तपासणी संस्थांना" कशी पाठवायची हे आमच्या "कोरोना व्हायरस माहिती हबवर" जाणून घेऊ शकता.

खाजगीरीत्या कनेक्ट होण्याची गरज लोकांना आता पूर्वीपेक्षाही अधिक वाटते, असे आम्हाला वाटते. या अभूतपूर्व जागतिक संकटाच्या वेळी WhatsApp ला विश्वासाने कार्यरत ठेवण्यासाठी आमच्या टीम्स कठोर प्रयत्न करत आहेत. नेहमीप्रमाणे तुमचा फीडबॅक स्वागतार्हच असेल आणि लोकांना WhatsApp वर एकमेकांशी माहिती शेअर करणे सुलभ व्हावे यासाठीचे नवनवीन मार्ग शोधण्यात आम्ही सदैव कार्यरत राहू.

डार्क मोड - या फिचरसाठी अनेक वापरकर्त्यांनी सर्वाधिक मागणी केली होती आणि ते फिचर WhatsApp वर आता येत आहे हे सांगताना आम्हाला खूप आनंद होत आहे.

डार्क मोड मुळे नेहमीच्या अंगवळणी पडलेल्या WhatsApp वापरास एक फ्रेश लुक मिळाला आहे. कमी प्रकाश असणाऱ्या ठिकाणी डोळ्यावर कमी ताण पडावा यादृष्टीने याची निर्मिती केली आहे. आणि अंधाऱ्या खोलीत तुमच्या फोनचा प्रखर लाईट चालू झाल्याने जी पंचाईत होते ती आता टळू शकेल असे आम्हाला वाटते.

डार्क मोडची निर्मिती करत असताना आम्ही संशोधन आणि प्रयोगांसाठी जो वेळ दिला त्यामध्ये प्रामुख्याने दोन मुद्द्यांवर भर दिला होता :

वाचन सुसह्य करणे : रंग निवडत असताना आम्हाला डोळ्यांवरचा ताण कमी करायचा होता म्हणून आम्ही असे रंग निवडले जे iPhone आणि Android च्या सिस्टम डिफॉल्ट रंगांशी मिळतेजुळते असतील.

माहितीची संरचना : प्रत्येक स्क्रीनवर वापरकर्त्यांना लक्ष केंद्रित करणे सोपे जावे यासाठी मदत होईल. हे करण्यासाठी आम्ही असे रंग आणि डिझाईन वापरले आहे ज्यामुळे महत्त्वाची माहिती जास्त उठून दिसेल.

Android 10 आणि iOS 13 च्या सिस्टम सेटिंगमध्ये जर तुम्ही डार्क मोड सक्षम केला असेल तर WhatsApp मध्ये तो आपोआप सुरु होईल. Android 9 होऊन जुन्या आवृत्तींसाठी तुम्ही WhatsApp सेटिंग्ज > चॅट > थीम > ‘डार्क’ निवडून तुम्ही तो सुरु करू शकता.

WhatsApp च्या नवीन आवृत्तीवर डार्क मोड उपलब्ध होणार आहे आणि आम्हाला आशा आहे की तुम्हाला हे फिचर नक्कीच आवडेल.

आम्हाला हे शेअर करण्यास खूप आनंद होत आहे की आता जगभरात दोन अब्ज लोक WhatsApp वापरतात.

वडीलधारी माणसं त्यांच्या जिवलगांच्या ते जगाच्या पाठीवर कोठेही असले तरीही अगदी सहज संपर्कात येऊ शकतात. बहीण भावंडं एकमेकांशी मौल्यवान क्षण शेअर करू शकतात. सहकर्मचारी एकमेकांशी सहयोग वाढवू शकतात आणि ग्राहकांशी सहज कनेक्ट होऊन व्यवसाय वृद्धिंगत करू शकतात.

खाजगी संभाषणे, जी पूर्वी केवळ समोरासमोरच करणे शक्य असायचे ती आता चॅट्स आणि व्हिडिओ कॉलिंग द्वारे चटकन करता येतात. WhatsApp च्या या वाटचालीमध्ये अनेक महत्त्वाचे आणि मौलिक क्षण येऊन गेले आहेत. आम्ही एवढी मोठी मजल मारू शकलो याबद्दल आम्ही ऋणी असून हा आम्हाला आमचा सन्मान वाटतो.

आम्हाला कल्पना आहे की, जेवढे अधिक लोक संपर्कात येतील तेवढीच सुरक्षा देखील आम्हाला वाढवावी लागेल. आजकाल आपला ऑनलाईन वावर बराच वाढला असल्याने आपली संभाषणे सुरक्षित ठेवणे अधिकाधिक महत्त्वपूर्ण होत आहे.

आणि म्हणूनच WhatsApp वर पाठवलेले खाजगी संदेश हे मूलभूतरीत्या एन्ड टू एन्ड एन्क्रिप्शनने कूटबद्ध करून सुरक्षित केलेले आहेत. सशक्त एन्क्रिप्शन हे एका अभेद्य डिजिटल लॉक प्रमाणे कार्य करते जे तुम्ही WhatsApp वर पाठवत असलेली माहिती सुरक्षित ठेवते आणि तुम्हाला हॅकर्स आणि गुन्हेगारांपासून संरक्षण देते. संदेश हे तुमच्या फोनवरच ठेवले जातात आणि कोणीही हस्तक्षेप करून ते वाचू शकत नाहीत किंवा तुमचे कॉल्स ऐकू शकत नाहीत, अगदी आम्हीदेखील नाही. तुमची खाजगी संभाषणे तुमच्यामध्येच राहतात.

या आधुनिक काळामध्ये सशक्त एन्क्रिप्शन असणे अतिशय गरजेचे आहे. आम्ही सुरक्षेमध्ये कधीही तडजोड करणार नाही कारण तसे केल्यास लोकांची सुरक्षितता कमी होऊ शकते. अधिक सुरक्षेसाठी आम्ही उच्च सुरक्षा तज्ञांबरोबर काम करतो आणि इंडस्ट्रीमधील अग्रेसर टेक्नॉलॉजीचा वापर करून गैरवापर होणे थांबवितो तसेच, ते नियंत्रित करण्यासाठी व तक्रार नोंदवण्यासाठी गोपनीयतेशी तडजोड न करता विविध साधने प्रदान करतो.

लोकांना सोपी, सुरक्षित आणि खाजगी सेवा उपलब्ध करण्याच्या उद्देशानेच WhatsApp ची सुरुवात झाली होती. सुरुवातीला आम्ही जसे होतो तसेच आजही, जगभरातील लोकांना खाजगीरित्या कनेक्ट होण्यास मदत करण्यासाठी आणि जगभरातील दोन अब्ज लोकांची वैयक्तिक संभाषणे सुरक्षित ठेवण्यासाठी वचनबद्ध आहोत.

१२ फेब्रुवारी २०२०

लोकांना WhatsApp वरून त्यांच्या आवडत्या व्यवसायाशी संपर्कात राहायला आवडतं परंतु उत्पादनाची माहिती मिळविण्यासाठी अनेक फोटो आणि मेसेजेसची देवाणघेवाण करणं जिकिरीचं ठरतं. व्यवसाय जी उत्पादने आणि सेवा ऑफर करत आहेत ते जाणून घेणे अधिक सोपे व्हावे यासाठी आम्ही आज WhatsApp Business ॲप मध्ये कॅटलॉग फिचर आणत आहोत.

कॅटलॉग हे मोबाइलवरचे शोरूम असते ज्यामध्ये व्यवसायांना त्यांची उत्पादने मांडता येतात ज्यामुळे ग्राहकांना सर्व उत्पादने सहजपणे चाळता येतात आणि त्यांना जे हवे आहे ते चटकन शोधणे शक्य होते. पूर्वी व्यवसायांना त्यांच्या उत्पादनाचे फोटो एका पाठोपाठ एक असे पाठवावे लागत आणि वारंवार माहिती पाठवावी लागे - आता ग्राहकांना सर्व माहिती WhatsApp मधील कॅटलॉगमधून सहज मिळवता येईल. यामुळे व्यावसायिक जास्त प्रोफेशनल दिसतात तसेच ग्राहकांचे चॅट मधील स्वारस्य टिकून राहण्यामध्ये व त्यांची वेबसाईट बघण्याची उस्तवार टाळणे शक्य होते.

जसे की, इंडोनेशिया मधील टिकाऊ औषधी वनस्पती आणि मसाल्याच्या Agradaya या व्यवसायाचे संस्थापक अंधिका महारदिका यांना आम्ही कॅटलॉग फिचर लवकर उपलब्ध करून दिले होते आणि त्यांनी आम्हाला सांगितले की ग्राहकांना त्यांची उत्पादने जाणून घेणे, किंमती जाणून घेणे आणि ते काय ऑफर करतात याचे फोटो पाहणे सुलभ झाले आहे - जे त्यांच्या ग्राहकांना अधिक चांगल्या सेवा पुरवण्यासाठी आवश्यक आहे.

व्यावसायिक कॅटलॉगमधील प्रत्येक वस्तूसाठी किंमत, वर्णन आणि उत्पादन कोड यासारखी माहिती समाविष्ट करू शकतो. व्यवसाय आणि ग्राहक दोघांच्याही फोनवरची महत्त्वाची स्टोरेज स्पेस वाचवण्यासाठी WhatsApp ने हे कॅटलॉग फिचर विकसित केले आहे.

WhatsApp Business ॲप मध्ये कॅटलॉग तयार करण्यासाठी काही सोप्या पायऱ्या आहेत. सुरु करण्यासाठी हा व्हिडिओ पहा :

आजपासून Android आणि iPhone साठी WhatsApp Business ॲप वर ब्राझील, जर्मनी, भारत, इंडोनेशिया, मेक्सिको, युनायटेड किंग्डम आणि अमेरिका या देशांमध्ये कॅटलॉग फिचर उपलब्ध होत आहे. जगभरात इतरत्र ते लवकरच उपलब्ध करून दिले जाईल. छोट्या व्यवसायांना त्यांच्या ग्राहकांशी कनेक्ट होण्यास आणि व्यवसाय वाढविण्यास कॅटलॉग कशी मदत करतात हे ऐकण्यासाठी आम्ही उत्सुक आहोत.

७ नोव्हेंबर २०१९

या वर्षाच्या सुरूवातीस, WhatsApp वापरकर्त्यांना सुरक्षिततेचा अतिरिक्त स्तर प्रदान करण्यासाठी आम्ही iPhone साठी 'टच आय डी' आणि 'फेस आय डी' ही वैशिष्ट्ये आणली. आज आम्ही Android फोनसाठी देखील असे प्रमाणीकरण सादर करीत आहोत ज्यामुळे आपण आपले फिंगरप्रिंट वापरून ॲप अनलॉक करू शकता. ते सुरु करण्यासाठी, सेटिंग्ज > खाते > गोपनीयता > फिंगरप्रिंट लॉक वर टॅप करा. "फिंगरप्रिंट वापरून अनलॉक करा" हे चालू वर सेट करा आणि तुमच्या फिंगरप्रिंटची पुष्टी करा.

WhatsApp मधील ग्रुप्स हे कुटुंब, मित्रमैत्रिणी, सहकर्मचारी, वर्गमित्र आणि इतर कोणीही असो, त्यांच्याशी संपर्कात राहण्यासाठी नेहमीच वापरले जातात. जसजसे लोकांनी ग्रुप्सचा वापर अधिक महत्त्वाच्या संभाषणांसाठी सुरु केला तसे त्यांनी ही संभाषणे अधिक नियंत्रित कशी ठेवता येतील याविषयी विचारणा सुरु केली. आज आम्ही नवीन 'गोपनीयता सेटिंग' व आमंत्रण प्रणाली आणली आहे ज्यामुळे तुम्हाला कोण कोण ग्रुपमध्ये जोडू शकेल हे तुम्हीच ठरवू शकता.

ते सुरु करण्यासाठी, तुमच्या ॲपच्या सेटिंग्ज मध्ये जा, त्यानंतर खाते > गोपनीयता > गट येथे टॅप करा आणि "प्रत्येकजण", "माझे संपर्क" किंवा "यांना वगळा" यापैकी एक पर्याय निवडा. "माझे संपर्क" निवडले तर जे संपर्क तुमच्या फोनच्या ॲड्रेस बुक मध्ये आहेत तेच तुम्हाला ग्रुपमध्ये जोडू शकतात. "यांना वगळा" निवडले तर ॲड्रेस बुक मधील संपर्कांमधून तुम्हाला कोणी वगळायचे असल्यास ते तुम्ही ठरवू शकता.

अशा नियंत्रणामुळे, जे ॲडमीन तुम्हाला ग्रुपमध्ये जोडू शकत नाहीत त्यांनी तुम्हाला खाजगी चॅट द्वारे आमंत्रण पाठविणे गरजेचे आहे असे त्यांना सूचित केले जाईल. यामुळे तुम्हाला ग्रुपमध्ये सामील व्हायचे की नाही हे तुम्ही आमंत्रण स्वीकारून अथवा नाकारून ठरवू शकता. आमंत्रण कालबाह्य होण्यापूर्वी तुमच्याकडे तीन दिवस असतील.

या नवीन फिचर मुळे, वापरकर्त्यांना ग्रुप मेसेजेस नियंत्रणामध्ये ठेवणे शक्य होईल. आजपासून हे गोपनीयता सेटिंग्ज काही वापरकर्त्यांसाठी उपलब्ध होईल आणि येणार्‍या आठवड्यांमध्ये WhatsApp ची नवीनतम आवृत्ती असलेल्यांना ते संपूर्ण जगभरात उपलब्ध होईल.

अपडेट : सुरुवातीला जेव्हा आम्ही हे फिचर उपलब्ध केले होते तेव्हाच्या वापरकर्त्यांच्या अभिप्रायानुसार "कोणीच नाही" या पर्यायाऐवजी "यांना वगळा" हा पर्याय आता आम्ही देत आहोत. यामुळे तुम्ही काही विशिष्ट संपर्कांना वगळायचे असल्यास तसे करू शकता किंवा "सर्वांना निवडले" तर कोणीच तुम्हाला तुमच्या परवानगी शिवाय ग्रुपमध्ये जोडू शकणार नाही. हा नवीन अपडेट WhatsApp ची नवीन आवृत्ती वापरणाऱ्यांना संपूर्ण जगभरात उपलब्ध होईल.

अखेरचा अपडेट : ५ नोव्हेंबर २०१९

कित्येक लघु उद्योजकांनी आमच्याकडे अनेक वेळा विचारणा केली की त्यांना त्यांच्या मनपसंत डिव्हाइस वर WhatsApp Business अ‍ॅप वापरायला आवडेल.

आता ते करू शकतात.

आज आम्ही iOS साठी WhatsApp Business अ‍ॅप आणत आहोत. Android आवृत्ती — जिचा जगभरात लाखो व्यावसायिकांनी वापर केला आहे — त्याप्रमाणेच iOS साठी WhatsApp Business अ‍ॅप हेदेखील Apple अ‍ॅप स्टोअर मधून मोफत डाउनलोड करता येईल आणि त्यामध्ये लघुउद्योजक आणि त्यांचे ग्राहक यांचा संवाद सोपा होण्यासाठीची फीचर्स उपलब्ध असतील. यामध्ये पुढील गोष्टींचा समावेश असेल :

• व्यावसायिक प्रोफाइल : तुमच्या व्यवसायाबद्दलची उपयुक्त माहिती जसे की व्यवसायाचे वर्णन, ई-मेल किंवा दुकानाचा पत्ता आणि वेबसाईट शेअर करू शकता.
• मेसेजिंग साधने : उपयुक्त अशी मेसेजिंग साधने वापरून ग्राहकांना प्रत्युत्तर द्या जसे की — तात्काळ प्रत्युत्तर वापरून नेहमी विचारल्या जाणाऱ्या प्रश्नांना चटकन उत्तर देणे स्वागत संदेश वापरून नवीन ग्राहकांचे स्वागत करणे आणि व्यस्तता संदेश वापरून तुम्ही त्यांना कधी उत्तर देऊ शकतात ते कळवणे.
• WhatsApp वेब : संभाषणे व्यवस्थापित करण्यासाठी तुमच्या डेस्कटॉप वरून चॅट करा आणि ग्राहकांना फाइल पाठवा.

WhatsApp Business अ‍ॅप हे आजपासून उपलब्ध आहे आणि ते ब्राझील, जर्मनी, इंडोनेशिया, भारत, मेक्सिको, लंडन आणि अमेरिका या देशांमध्ये अ‍ॅप स्टोअर वर मोफत डाउनलोड करता येईल. हे अ‍ॅप जगभरात पुढील काही आठवड्यांमध्ये उपलब्ध होईल.

जगभरातील लघु उद्योजक त्यांचा व्यवसाय वाढवण्यासाठी, मग ते ब्राझील मधील ऑनलाईन स्वीट शॉप असो ज्यांनी ६० टक्के विक्री WhatsApp Business मार्फत केली किंवा बंगळुरू, भारत येथे शहरातील छोट्या घरांसाठी कंपोस्ट बिन डिझाईन करणारा लघु उद्योग असो, ते अमेरिका, ऑस्ट्रेलियासारख्या लांबच्या ग्राहकांशी संवाद साधण्यासाठी आमच्या अ‍ॅपचा वापर करतात. अजूनही लहान उद्योगांसाठी WhatsApp Business अ‍ॅप सज्ज करण्यासाठी आणि त्यांना व्यवसायात यश मिळविण्यासाठी कशी मदत झाली हे ऐकण्यासाठी आम्ही उत्सुक आहोत.

WhatsApp सुरु होऊन आता १० वर्षे झाली आहेत! गेल्या दशकामध्ये जगभरातील अनेक लोकांकडून आम्ही ऐकले आहे की ते त्यांच्या जवळच्या लोकांशी संपर्कात राहण्यासाठी, समाजाशी संपर्क ठेवण्यासाठी, आणि व्यवसाय वृद्धिंगत करण्यासाठी WhatsApp वापरतात. अशा कहाण्यांमुळे आम्हाला अजूनच स्फूर्ती मिळते आणि हा महत्वाचा टप्पा साजरा करण्यासाठी आम्ही गेल्या काही वर्षातील मौल्यवान क्षणांकडे दृष्टिक्षेप टाकत आहोत.

आम्ही यापुढे देखील याच उत्साहाने WhatsApp साठी अधिकाधिक सोपे आणि प्रत्येकाला विश्वासार्ह असतील असे फिचर्स तयार करणे असेच सुरु ठेऊ. या प्रवासामध्ये आमची कायम साथ दिल्याबद्दल आम्ही जगभरातील सर्व वापरकर्त्यांचे आभार मानतो!

WhatsApp मध्ये, खाजगी मेसेजिंगबद्दल आम्ही नेहमीच जागरूक असतो आणि म्हणूनच आज आम्हाला सांगण्यास आनंद होत आहे की हे शक्य होण्यासाठी आम्ही iPhone वरील WhatsApp मध्ये 'टच आय डी' आणि 'फेस आय डी' अर्थात 'स्पर्श ओळख' आणि 'चेहरा ओळख' घेऊन येत आहोत.

यामुळे इतर कोणी तुमचा फोन घेऊन तुमचे संदेश वाचणे शक्य होणार नाही.

WhatsApp चे हे फिचर iPhone वर सुरु करण्यासाठी सेटिंग्ज > खाते > गोपनीयता > स्क्रीन लॉक येथे टॅप करा आणि 'टच आय डी' किंवा 'फेस आय डी' सुरु करा. तुम्हाला बंद केल्यानंतर किती कालावधीनंतर तुम्हाला 'टच आय डी' आणि 'फेस आय डी' साठी विचारण्यात यावे हे तुम्ही निवडू शकता.

हे फिचर iPhone 5s अधिक किंवा iOS 9 किंवा अधिक आवृत्तींवर उपलब्ध आहे.