એન્ડ-ટૂ-એન્ડ એન્ક્રિપ્શન

WhatsAppએ હંમેશાં તમારા ડેટા અને સંચારને શક્ય હોય એટલા સુરક્ષિત બનાવવાને પ્રાથમિકતા આપી છે. અને આજે, અમને એ જાહેર કરતા ગર્વ થાય છે કે અમે તમારા ખાનગી સંચારને સુરક્ષિત રાખવામાં WhatsAppને અગ્રણી બનાવતો ટેક્નોલોજીકલ વિકાસ પૂરો કરી લીધો છે: સંપૂર્ણ એન્ડ-ટૂ-એન્ડ એન્ક્રિપ્શન. હવેથી જ્યારે તમે અને તમારા સંપર્કો ઍપના નવીનતમ વર્ઝનનો ઉપયોગ કરશો, ત્યારે તમે કરો તે દરેક કૉલ અને તમે મોકલો તે દરેક મેસેજ, ફોટા, વીડિયો, ફાઇલ અને વૉઇસ મેસેજ ડિફોલ્ટ રૂપથી એન્ડ-ટૂ-એન્ડ એન્ક્રિપ્શનથી સુરક્ષિત હોય છે, જેમાં ગ્રૂપ ચેટનો સમાવેશ થાય છે.

આનો વિચાર સરળ છે: જ્યારે તમે મેસેજ મોકલો છો, ત્યારે તેને વાંચી શકનારી એકમાત્ર વ્યક્તિ એ તે વ્યક્તિ કે ગ્રૂપ ચેટ છે કે જેને તમે મેસેજ મોકલો છે. કોઈ પણ તે મેસેજની અંદરના કન્ટેન્ટને જોઈ શકતું નથી. સાયબરક્રિમિનલ નહિ. હેકર નહિ. દમનકારી સરકારો નહિ. અમે પણ નહિ. એન્ડ-ટૂ-એન્ડ એન્ક્રિપ્શન, WhatsApp દ્વારા સંચારને ખાનગી બનાવવામાં મદદ કરે છે – એક પ્રકારે જોવા જઈએ તો સામ-સામે વાતચીતની જેમ.

એન્ડ-ટૂ-એન્ડ એન્ક્રિપ્શન કેવી રીતે કામ કરે છે તે વિશે વધુ જાણવામાં જો તમને રુચિ હોય, તો તમે તેના વિશે અહીં વાંચી શકો છો. પરંતુ તમારે ફક્ત એટલું જાણવાની જરૂર છે કે એન્ડ-ટૂ-એન્ડ એન્ક્રિપ્શનથી સુરક્ષિત મેસેજ ફક્ત તમે ઇચ્છો તે મેસેજ મેળવનારા દ્વારા જ વાંચી શકાય છે. અને જો તમે WhatsAppના નવીનતમ વર્ઝનનો ઉપયોગ કરી રહ્યા છો, તો તમારે તમારા મેસેજને એન્ક્રિપ્ટ કરવા માટે કંઈ કરવાનું નથી: એન્ડ-ટૂ-એન્ડ એન્ક્રિપ્શન ડિફોલ્ટ રૂપથી અને આખો વખત ચાલુ રહે છે.

આપણે એવા વિશ્વમાં રહીએ છીએ જ્યાં આપણા ડેટાને પહેલાં ક્યારેય કરવામાં આવ્યો ન હતો તેથી વધુ ડિજિટાઇઝ કરવામાં આવે છે. દરરોજ આપણે સંવેદનશીલ રેકોર્ડ અયોગ્ય રીતે એક્સેસ કરવામાં આવ્યાની અથવા ચોરવામાં આવ્યાની સ્ટોરીને જોઈએ છીએ. અને જો કંઈ કરવામાં ન આવે, તો આવનારા વર્ષોમાં લોકોની વધુ ડિજિટલ માહિતી અને સંચાર હુમલા માટે સંવેદનશીલ બનશે. સદ્ભાગ્યે, એન્ડ-ટૂ-એન્ડ એન્ક્રિપ્શન આ નબળાઈઓથી આપણી સુરક્ષા કરે છે.

એન્ક્રિપ્શન એ નવા ડિજિટલ યુગમાં સલામતી અને સુરક્ષાને પ્રોત્સાહન આપવા માટે સરકારો, કંપનીઓ અને વ્યક્તિઓ પાસે રહેલાં સૌથી મહત્ત્વનાં ટૂલ પૈકી એક છે. તાજેતરમાં એન્ક્રિપ્ટેડ સેવાઓ અને કાયદાનું અમલ કરાવતી સંસ્થાઓના કાર્ય વિશે ઘણી ચર્ચા થઈ છે. જોકે અમે લોકોને સુરક્ષિત રાખવામાં કાયદાનું અમલ કરાવતી સંસ્થાઓના મહત્ત્વપૂર્ણ કાર્યને સ્વીકારીએ છીએ, તેમ છતાં એનક્રિપ્શનને નબળા કરવાના પ્રયત્નોથી લોકોની માહિતી સાયબરક્રિમિનલ, હેકર અને દુષ્ટ રાજ્યો દ્વારા દુરુપયોગ થવા માટે છતી થવાનું જોખમ ઊભું થાય છે.

જોકે WhatsApp એ તમે કરો છો તે દરેક બાબત માટે ડિફોલ્ટ રૂપથી ચાલુ રહેતા સંપૂર્ણ એન્ડ-ટૂ-એન્ડ એન્ક્રિપ્શનને બનાવનારાં થોડાં સંચાર પ્લેટફોર્મ પૈકી એક છે, તેમ છતાં અમે અપેક્ષા રાખીએ છીએ કે તે આખરે વ્યક્તિગત સંચારના ભાવિને રજૂ કરશે.

લોકોના ખાનગી સંચારને સુરક્ષિત રાખવાની ઇચ્છા એ અમે WhatsApp ખાતે ધરાવીએ છીએ તે મૂળભૂત માન્યતાઓમાંથી એક છે અને મારા માટે, તે વ્યક્તિગત છે. સામ્યવાદી શાસન દરમિયાન USSRમાં મારો ઉછેર થયો હતો અને એ હકીકત કે લોકો મુક્તપણે બોલી શકતા ન હતા, એ મારા કુટુંબે યુનાઇટેડ સ્ટેટ્સમાં સ્થળાંતર કર્યું તે પાછળનું એક કારણ છે.

આજે, સમગ્ર વિશ્વમાં એક અબજથી વધુ લોકો તેમના મિત્રો અને કુટુંબીજનો સાથે સંપર્કમાં રહેવા માટે WhatsAppનો ઉપયોગ કરી રહ્યાં છે. અને હવે, તેમાંથી દરેક વ્યક્તિ WhatsApp પર મુક્તપણે અને સુરક્ષિત રીતે વાત કરી શકે છે.

જાન અને બ્રાયન