आम्ही व्हॉइस मेसेजेस अधिक चांगले बनवत आहोत

आम्ही जेव्हा २०१३ मध्ये प्रथम व्हॉइस मेसेजेस लाँच केले, तेव्हा त्यामुळे लोकांच्या संवाद साधण्याच्या पद्धतीमध्ये बदल घडू शकेल याची आम्हाला खात्री होती. डिझाईन साधे ठेवल्यामुळे, एखादा व्हॉइस मेसेज रेकॉर्ड करून पाठवणे हे आम्ही मजकूर पाठवण्याइतकेच जलद आणि सोपे केले आहे. WhatsApp वर दररोज आमचे वापरकर्ते सरासरी ७०० कोटी व्हॉइस मेसेजेस पाठवतात, जे नेहमी खाजगी आणि सुरक्षित ठेवण्यासाठी एन्ड-टू-एन्ड एन्क्रिप्शनने सुरक्षित केले जातात.

WhatsApp वरील व्हॉइस मेसेजचा अनुभव अधिक चांगला करणार्‍या नवीन फीचर्सची घोषणा करताना आम्हाला आज अत्यंत आनंद होत आहे. यामध्ये या गोष्टी समाविष्ट आहेत:

• चॅट बाहेरील प्लेबॅक: चॅटच्या बाहेर जाऊन व्हॉइस मेसेज ऐका जेणेकरून तुम्हाला त्याचवेळी इतर कामेदेखील करता येतील किंवा इतर मेसेजेसना प्रतिसाद देता येईल.
• रेकॉर्डिंग पॉज/पुन्हा सुरू करा: व्हॉइस मेसेज रेकॉर्ड करताना व्यत्यय आल्यास किंवा तुम्हाला अधिक विचार करण्यासाठी वेळ हवा असल्यास तुम्ही आता रेकॉर्डिंग पॉज करू शकता आणि हवे तेव्हा ते पुन्हा सुरू करू शकता.
• वेव्हफॉर्म व्हिज्युअलायझेशन: हे व्हॉइस मेसेजमधील रेकॉर्डिंगला फॉलो करता यावे यासाठी तुम्हाला त्यातील आवाजाचे एक व्हिज्युअल प्रतिरुपण दर्शवते.
• ड्राफ्टचे पूर्वावलोकन: तुमचे व्हॉइस मेसेजेस पाठवण्याआधी ते ऐकणे.
• लक्षात ठेवता येणारे प्लेबॅक: एखादा व्हॉइस मेसेज ऐकताना तुम्ही तो पॉज केल्यास, चॅट पुन्हा उघडल्यानंतर, तुम्ही जिथे थांबलात तिथून तो पुन्हा ऐकता येणे.
• फॉरवर्ड केलेल्या मेसेजेसचा जलद प्लेबॅक: नियमित तसेच फॉरवर्ड केलेले मेसेजेस जलदपणे ऐकण्यासाठी 1.5x किंवा 2x गतीने प्ले करणे.

व्हॉइस मेसेजेसमुळे अर्थपूर्ण संवाद साधणे लोकांसाठी आता जलद आणि सोपे झाले आहे. मजकुरापेक्षा आवाजाद्वारे भावना आणि उत्साह व्यक्त करणे अधिक नैसर्गिक आहे, आणि अनेक परिस्थितींमध्ये WhatsApp वर संभाषण करताना व्हॉइस मेसेजेसना अधिक पसंती दिली जात आहे. हे सर्वांसाठी वापरण्यास अत्यंत सोपे आहे - टाइपिंग न करू इच्छिणारे तुमचे कुटुंबीय, किस्से सांगण्याची आवड असलेले तुमचे मित्र, प्रोत्साहनाची गरज असलेले तुमचे समवयस्क, किंवा जेव्हा एका धकाधकीच्या दिवसाच्या शेवटी तुम्हाला तुमच्या जोडीदाराचा आवाज ऐकावासा वाटतो.

येत्या काही आठवड्यांमध्ये उपलब्ध होणार्‍या या फीचर्सचा वापर वापरकर्त्यांनी करून पाहावा याकडे आम्ही उत्सुकतेने पहात आहोत.