400 મિલિયન સ્ટોરી

થોડા જ વર્ષો પહેલાંની વાત છે, મારા મિત્ર, બ્રાયન અને મેં આ એક જ બાબત પર ધ્યાન આપવાની સાથે મેસેજિંગ સેવા બનાવવાનું કામ શરૂ કર્યું હતું: વાપરનાર માટે શ્રેષ્ઠ સંભવિત અનુભવ. અમે શરત લગાવેલી કે જો અમારા એન્જિનિયરોની ટીમ મેસેજિંગને ઝડપી, સરળ અને વ્યક્તિગત બનાવી શકે, તો અમે ત્રાસજનક બેનર જાહેરાતો, ગેમના પ્રચારો અથવા અનેક મેસેજિંગ ઍપની સાથે આવતી હોય તે બધી અન્ય વિચલિત કરતી “સુવિધાઓ” પર નિર્ભર રહેવાની જરૂર પડ્યા વિના સેવા માટે લોકો પાસેથી સીધા જ શુલ્ક વસૂલી શકીશું.

આજે, અમને એ જાહેર કરતા ગર્વ થાય છે કે તમારા કારણે, WhatsApp એવા માઇલસ્ટોન પર પહોંચી ગયું છે કે જે અન્ય કોઈ મોબાઇલ મેસેજિંગ સેવાએ હાંસલ કર્યું નથી: 400 મિલિયન માસિક એક્ટિવ વાપરનારાઓ, જેમાં એકલા છેલ્લા ચાર મહિનામાં જ 100 મિલિયન એક્ટિવ વાપરનારાઓ ઉમેરવામાં આવ્યા છે. આ તે લોકોની ગણના નથી કે જેમણે બસ WhatsApp માટે રજિસ્ટ્રેશન કરેલું - તે એવાં લોકોની સંખ્યા છે કે જેઓ દરેક મહિનામાં સેવાનો એક્ટિવ રીતે ઉપયોગ કરી રહ્યાં છે.

જ્યારે અમે કહીએ છીએ કે તમે આ શક્ય બનાવ્યું છે, ત્યારે અમે ખરેખર સત્ય કહીએ છીએ. WhatsApp માત્ર 50 કર્મચારી ધરાવે છે અને અમારામાંથી મોટા ભાગના એન્જિનિયરો છે. અમે ટાર્ગેટેડ જાહેરાતો અથવા મોટાં માર્કેટિંગ કેમ્પેન પર ડોલર ખર્ચ્યા વિના આ ક્ષણ પર આવી પહોંચ્યા છીએ. અમે અહીં તે બધાં લોકોને કારણે છીએ કે જેઓ તેમની WhatsApp સ્ટોરીને સહ-કાર્યકરો, મિત્રો અને પ્રિયજનો સાથે શેર કરે છે - એવી સ્ટોરી કે જે સાંભળવી અમને બહુ ગમશે.

ન્યૂઝીલેન્ડની એક મહિલા હતી કે જેણે તેની PhD પૂરી કરવા માટે દક્ષિણ આફ્રિકામાં સ્થળાંતર કરેલું. તે પોતાના ઘરે પાછી ફરવા માટે નીકળી તેના એક અઠવાડિયા પહેલાં, તેની મુલાકાત તેના આદર્શ જીવનસાથી સાથે થઈ હતી. એકબીજાથી હજારો માઈલ દૂર રહેતા હોવા છતાં, તેણે અમને કહ્યું કે WhatsAppને લીધે તેઓ પહેલાં ક્યારેય ન હતાં તેટલા વધુ એકબીજાની સમીપ હોવાનું અનુભવી શકે છે.

યુગાન્ડામાં ધર્માદા સંસ્થા ચલાવનારી બ્રિટિશ મહિલા પાસેથી પણ અમને પ્રતિસાદ મળ્યો છે. તેણે અમને કહ્યું કે ગ્રાઉન્ડ પરની તેની ટીમ તેઓ જેમની મદદ કરી રહ્યા છે તે બાળકો અંગેના દૈનિક રિપોર્ટ, ફોટા અને વીડિયો મોકલવા માટે WhatsAppનો ઉપયોગ કરે છે, જેને તે વિશ્વભરમાં તેની સંસ્થા માટે સપોર્ટ ઊભો કરવા માટે શેર કરે છે.

ભારતના ડૉક્ટરો હૃદયરોગના હુમલાથી પીડિત દર્દીઓના ઇલેક્ટ્રોકાર્ડિયોગ્રામ ફોટા ત્વરિત રીતે મોકલવા માટે WhatsAppનો ઉપયોગ કરી રહ્યા છે, જે મૂલ્યવાન સમય અને સંભવિતપણે જીવનને બચાવે છે. મેડ્રિડના પર્વતોમાં, બચાવકર્તાઓએ ખોવાઈ ગયેલા પર્યટકો (હાઇકર)ને શોધવા અને તેમને બચાવવા માટે WhatsAppનો ઉપયોગ કર્યો છે. અને આજે, જ્યારે હું મારો જ્યાં જન્મ થયેલો અને સોળ વર્ષની ઉંમર સુધી જીવ્યો હતો તેવી જગ્યા, યુક્રેનમાં થઈ રહેલી રાજકીય સંકટને અનુસરું છું, ત્યારે હું એવી આશા રાખવાથી પોતાને રોકી શકતો નથી કે આગામી ઉત્કૃષ્ટ WhatsApp સ્ટોરી એવાં લોકો વિશે હશે કે જેઓ પોતાના મનની વાત કહેવા અને તેમના મૂળભૂત અધિકારોની તરફેણ કરવા માટે સેવાનો ઉપયોગ કરી રહ્યાં હોય.

WhatsApp બનાવવાનું અમારું લક્ષ્ય લોકોને ટેક્નોલોજી અને સંચાર મારફતે સશક્ત બનાવવાનું હતું, પછી ભલેને તેઓ જે કોઈ પણ હોય અથવા ગમે ત્યાં રહેતા હોય. અમે કોઈક નાની રીતે લોકોનાં જીવનને સુધારવા માંગતા હતા. તેથી, તે શક્ય બનાવવા બદલ આભાર. તમારી સ્ટોરી શેર કરવા બદલ આભાર અને કૃપા કરીને તેને આવવા દો - અમે એ સાંભળવા માટે આતુર છીએ કે તમે આગળ શેના માટે WhatsAppનો ઉપયોગ કરશો.