WhatsApp વિશ્વ આરોગ્ય સંસ્થા (WHO) સાથે "Vaccine for All" નામના એક નવા સ્ટિકર પૅકની જાહેરાત કરતા ગર્વ અનુભવે છે. અમે આશા રાખીએ છીએ કે આ સ્ટિકર COVID-19ની રસીઓ દ્વારા પ્રદાન કરવામાં આવતી શક્યતાઓ વિશે લોકોને જોડાવા અને તેમના દ્વારા અનુભવાતા આનંદ, રાહત અને આશાને ખાનગીરૂપે વ્યક્ત કરવાનો અને જેઓએ આ લાંબા અને કપરા સમય દરમિયાન તેમના જીવન-બચાવના કાર્ય ચાલુ રાખ્યા છે તે સ્વાસ્થ્યકર્મી હીરો પ્રત્યે તેમની પ્રસંશા દર્શાવવાની મનોરંજક અને રચનાત્મક રીત પ્રદાન કરશે.

મહામારીની શરૂઆતથી જ, અમારા 2 અબજથી વધુ વાપરનારાઓને સચોટ માહિતી અને સંસાધનો સાથે જોડવા માટે અમે 150થી વધુ રાષ્ટ્રીય, રાજ્ય અને સ્થાનિક સરકારો તથા WHO અને UNICEF જેવી સંસ્થાઓ સાથે COVID-19 હેલ્પલાઇન પર ભાગીદારી કરી છે. આ વૈશ્વિક હેલ્પલાઇન પર સમગ્ર વિશ્વમાં ગયા વર્ષે 3 અબજથી વધુ મેસેજ મોકલવામાં આવ્યા છે.

ઘણા દેશોમાં મહામારી નવા તબક્કામાં પ્રવેશતાં, ઇન્ડોનેશિયા, દક્ષિણ આફ્રિકા, આર્જેન્ટિના, બ્રાઝિલ અને ભારત જેવા દેશોમાં, સરકારો આ હેલ્પલાઇનનો ઉપયોગ નાગરિકોને ખાનગીરૂપે સચોટ રસીકરણની માહિતી અને રજિસ્ટ્રેશન સાથે જોડવા માટે કરી રહી છે. ઇન્ડોનેશિયામાં, 500,000 તબીબી કર્મચારીઓએ આ સેવા પર સેવાના પ્રથમ 5 દિવસમાં તેમની રસીકરણની એપોઇન્ટમેન્ટ માટે રજિસ્ટ્રેશન કર્યું.

અમે સરકારો અને આંતરરાષ્ટ્રીય સંસ્થાઓને વિશ્વભરના શક્ય તેટલા વધુ લોકોને, ખાસ કરીને જે સ્થળોએ પહોંચવું મુશ્કેલ છે ત્યાં અથવા સીમાંત જૂથોમાં રહેલા લોકોને રસીકરણની માહિતી અને સેવા સાથે જોડવામાં મદદ કરવા માંગીએ છીએ. અમે અમારા WhatsApp Business API મારફત મોકલવામાં આવતા મેસેજમાંથી આવતી ફીને પણ માફ કરી દીધી છે.

જ્યારે આપણે, કેટલાક દેશોમાં, રૂબરૂમાં સાથે રહેવા તરફ ધીમે-ધીમે આગળ વધી રહ્યાં છીએ ત્યારે, અમે આશા રાખીએ છીએ કે લોકો તેમના ખાનગી વિચારો અને અનુભવો - અને આશાઓને - તેમના પરિવારજનો અને નજીકના મિત્રો સાથે WhatsApp પર શેર કરવાનું ચાલુ રાખશે.

"Vaccine for All" સ્ટિકર પૅક હવે WhatsAppની અંદર જ ઉપલબ્ધ છે.

અમને જાહેર કરતા આનંદ થાય છે કે તમે હવે WhatsApp ડેસ્કટોપ ઍપ પર એકબીજાને ખાનગી અને સુરક્ષિત રીતે વોઇસ અને વીડિયો કૉલ કરી શકશો, કેમ કે આ સુવિધા હવે ઍપમાં ઉપલબ્ધ છે.

પાછલા સમગ્ર વર્ષ દરમિયાન, મોટેભાગે લાંબી વાતચીતો માટે WhatsApp પર એકબીજાને કૉલ કરતા લોકોમાં અમને નોંધપાત્ર વધારો જોવા મળ્યો છે. નવા વર્ષની પૂર્વસંધ્યાએ, અમે 140 કરોડ વોઇસ અને વીડિયો કૉલ સાથે એક જ દિવસમાં કરવામાં આવેલા સૌથી વધુ કૉલનો રેકોર્ડ તોડ્યો. ઘણાં લોકો હજી પણ તેમના પ્રિયજનોથી દૂર છે અને કામ કરવાની નવી રીતો સાથે તાલમેળ બેસાડી રહ્યા છે, અમે WhatsApp પર વાતચીત કરવાની એવી સગવડ કરી આપવા માગીએ છીએ કે જેનાથી તમે દુનિયામાં ક્યાંય પણ હો કે જે પણ ટેક્નોલોજી વાપરી રહ્યા હો તેને ધ્યાનમાં લીધા વિના, શક્ય એટલો રૂબરૂમાં વાતચીત કરવા જેવો અનુભવ મેળવી શકો.

મોટી સ્ક્રીન પર જવાબ આપવાથી સહકર્મીઓ સાથે કામ કરવાનું વધુ સરળ બની જાય છે, તમારા પરિવારજનોને વધુ સ્પષ્ટ રીતે મોટી સ્ક્રીન પર જોવાનો આનંદ જ કંઈક જુદો હોય છે, ઉપરાંત રૂમમાં ફરતાંફરતાં વાત કરતી વખતે તમારા હાથ ખાલી રહે છે. ડેસ્કટોપ કૉલિંગને વધુ ઉપયોગી બનાવવા માટે, અમે એ બાબતની ખાતરી કરી છે કે તે આડી અને ઊભી બંને સ્ક્રીનમાં સરળતાથી કોઈ વિક્ષેપ વગર કામ કરે તથા તમારી કમ્પ્યૂટર સ્ક્રીન પર નાની-મોટી કરી શકાય એવી અલગ સ્ક્રીન દેખાય અને તે હંમેશાં બધી સ્ક્રીનની ઉપર રહે એમ સેટ કરી શકાય. જેથી, તમારી ચેટ કોઈ બ્રાઉઝરના ટેબમાં કે ખુલ્લી વિંડોના ઢગલામાં ન ખોવાઈ જાય.

WhatsApp પર વોઇસ અને વીડિયો કૉલ શરૂથી અંત સુધી સુરક્ષિત (એન્ડ ટૂ એન્ડ એન્ક્રિપ્ટેડ) છે, જેથી WhatsApp તેને સાંભળી કે જોઈ શકતું નથી, પછી ભલેને તમે તમારા ફોન કે કમ્પ્યૂટર ક્યાંયથી પણ કૉલ કરો. અમે WhatsApp ડેસ્કટોપ ઍપ પર વ્યક્તિગત કૉલથી શરૂઆત કરી રહ્યા છીએ. જેથી, અમે તમને એક વિશ્વસનીય અને ઉચ્ચ-ગુણવત્તાનો અનુભવ પૂરો પાડવાની ખાતરી કરી શકીએ. અમે ભવિષ્યમાં ગ્રૂપ વોઇસ અને વીડિયો કૉલ સામેલ કરીને આ સુવિધાને વિસ્તૃત કરીશું.

અમે આશા રાખીએ છીએ કે લોકો તેમના મિત્રો અને પરિવારજનો સાથે ખાનગી અને સુરક્ષિત કૉલિંગનો આનંદ માણશે. Windows PC અને Mac પર ડેસ્કટોપ ઍપ કેવી રીતે ડાઉનલોડ કરવી તે વિશે તમે અહીં વધુ વાંચી શકો છો.

આજે અમે જણાવવા માગીએ છીએ કે અમે કેવી રીતે અમારા WhatsApp વપરાશકર્તાઓને અમારી સેવાની શરતો અને પ્રાઇવસી પોલિસી વાંચીને તપાસવા તથા સ્વીકારવા માટે સૂચિત કરીશું. આ વર્ષની શરૂઆતમાં, આ અપડેટ વિશે અમારે ઘણી અફવાઓનો સામનો કરવો પડ્યો હતો અને અમે આવી કોઈ પણ જાતની ગૂંચવણ દૂર કરવા માટે ખૂબ જ ખંતથી કામ કરી રહ્યા છીએ.

અમે WhatsApp પર બિઝનેસ સાથે ચેટ કે ખરીદી કરવાની નવી રીતો વિકસાવી રહ્યા છીએ, જેનો ઉપયોગ કરવો કે નહિ તેનો નિર્ણય સંપૂર્ણપણે વપરાશકર્તાઓ પાસે જ રહેશે. પર્સનલ મેસેજ હંમેશાં શરૂથી અંત સુધી સુરક્ષિત (એન્ડ ટૂ એન્ડ એનક્રિપ્ટેડ) જ રહેશે, જેથી WhatsApp તેને વાંચી કે સાંભળી ન શકે.

અમારી નવી અપડેટ વિશે વધુ સ્પષ્ટતાથી તમને કેવી રીતે જણાવી શક્યા હોત તે વિશે અમે ચિંતન કર્યું છે. અમે ઇચ્છીએ છીએ કે શરૂથી અંત સુધીની સુરક્ષા એટલે કે એન્ડ ટૂ એન્ડ એન્ક્રિપ્શનના બચાવ માટે અમે શું કર્યું છે તેનો ઇતિહાસ દરેક વ્યક્તિ જાણે અને અમારા પર પૂર્ણ વિશ્વાસ રાખે, કેમ કે લોકોની પ્રાઇવસી અને સુરક્ષા અમારા માટે સર્વોપરી છે. અમે હવે 'સ્ટેટસ'ની સુવિધાનો ઉપયોગ કરીને અમારા સિદ્ધાંતો અને નવી અપડેટ સીધી WhatsAppમાંથી જ તમારી સાથે શેર કરી રહ્યા છીએ. અમે અમારી વાતને લોકો સુધી સ્પષ્ટપણે પહોંચાડીશું, જેથી કોઈ પણ જાતની ગૂંચવણ ઊભી ન થાય.

આવનારા અઠવાડિયાઓમાં, અમે WhatsAppમાં જ વધુ માહિતી સાથેનું બેનર દર્શાવીશું, જેથી લોકો નિરાંતે તેને વાંચી શકે. અમે લોકોના સવાલો અને ચિંતાઓનો ઉકેલ લાવવાના પ્રયત્નના ભાગરૂપે વધુ માહિતીનો સમાવેશ પણ કર્યો છે. અમે વિનંતી સહ લોકોને યાદ અપાવવાનું શરૂ કરીશું કે WhatsAppનો ઉપયોગ ચાલુ રાખવા માટે આ અપડેટને વાંચીને તપાસે અને સ્વીકારે.

અમને લાગે છે કે લોકો માટે એ જાણવું પણ જરૂરી છે કે અમે WhatsAppને કેવી રીતે મફતમાં ઉપલબ્ધ કરાવીએ છીએ. દરરોજે લાખો લોકો બિઝનેસ સાથે ચેટ શરૂ કરે છે, કેમ કે WhatsApp પર ચેટ કરવી એ ફોન કે ઇમેઇલ કરવા કરતાં ઘણું સરળ અને સગવડભર્યું છે. WhatsApp પર ગ્રાહક સેવા પૂરી પાડવા માટે અમે બિઝનેસ પાસેથી ચાર્જ લઈએ છીએ - લોકો પાસેથી નહિ. કેટલીક ખરીદીની સુવિધાઓ Facebookથી જોડાયેલી હોય છે, જેથી બિઝનેસ જુદીજુદી ઍપ પર પોતાના સ્ટોકની ભાળ રાખી શકે. અમે વધુ માહિતી સીધી WhatsAppમાં જ બતાવી દઈએ છીએ એટલે લોકો નક્કી કરી શકે કે તેઓને બિઝનેસ સાથે વાત કરવી છે કે નહિ.

અમે સમજીએ છીએ કે આ સમય દરમિયાન કેટલાક લોકો બીજી ઍપ શું ઑફર કરે છે તે જાણવા તેને અજમાવી શકે છે. અમે જોયું છે કે અમારી કેટલીક હરીફ કંપનીઓએ એવો દાવો કર્યો છે કે તેઓ લોકોના મેસેજ જોઈ શકતા નથી, પણ અમે તમને જણાવવા માગીએ છીએ કે જો કોઈ ઍપ શરૂથી અંત સુધીની સુરક્ષા એટલે કે એન્ડ ટૂ એન્ડ એન્ક્રિપ્શન મૂળભૂત રીતે ઑફર ન કરતી હોય, તો તેનો અર્થ એ છે કે તેઓ તમારા મેસેજ વાંચી શકે છે. બીજી બધી ઍપનું એવું કહેવું છે કે તેઓની ઍપ બહેતર છે કેમ કે તેઓ WhatsAppની તુલનાએ ઓછી માહિતી મેળવે છે. WhatsAppની પાસે બહુ મર્યાદિત ડેટાનો એક્સેસ હોય છે, એ પણ અમે તમને સુરક્ષિત અને ભરોસાપાત્ર સેવા પૂરી પાડી શકીએ તે માટે જ, અમારું માનવું છે કે લોકો પણ આવી જ ઍપની શોધમાં હોય છે જે સુરક્ષિત હોય અને જેના પર તેઓ ભરોસો કરી શકે. અમે અમારા નિર્ણયો પર ગંભીરતાથી વિચાર કરીએ છીએ અને આ જવાબદારીઓને સંતોષવા માટેની નવી રીતો વિકસાવતા રહીશું, જેમાં ઓછામાં ઓછી માહિતીનો ઉપયોગ થાય.

અમે એ બધા લોકોના આભારી છીએ જેમણે ચિંતાઓનો ઉકેલ લાવવામાં અમારી મદદ કરી અને કોઈ પણ સવાલનો જવાબ આપવા ઉપલબ્ધ રહ્યા. અમે 2021માં ઘણું લાવી રહ્યા છીએ અને આવનારા અમુક અઠવાડિયાઓ અને મહિનાઓમાં તેની જાણકારી તમારી સાથે શેર કરવા માટે આતુર છીએ.

અમારી નવી અપડેટને લઈને ઊભી થયેલી મુંઝવણ વિશે અમે ઘણા લોકો પાસેથી સાંભળ્યું છે. ઘણી અફવાઓ ફેલાઈ હોવાથી ચિતા વધી ગઈ છે અને અમે દરેકને અમારા સિદ્ધાંતો અને હકીકતો સમજવામાં મદદ કરવા ઇચ્છીએ છીએ.

WhatsAppને એક સરળ આશયથી બનાવવામાં આવ્યું હતું: તમે જે કંઈ તમારા મિત્રો અને કુટુંબ સાથે શેર કરો એ ફક્ત તમારી વચ્ચે જ રહે. એટલે કે અમે તમારી વ્યક્તિગત વાતચીતોને હંમેશાં શરૂથી અંત સુધીની સુરક્ષા (એન્ડ ટૂ એન્ડ એન્ક્રિપ્શન) દ્વારા સુરક્ષિત રાખીશું, જેથી WhatsApp અને Facebook બન્નેમાંથી કોઈ પણ આ પ્રાઇવેટ મેસેજ જોઈ ના શકે. એટલે જ અમે કોણ કોને મેસેજ કે કૉલ કરે છે એનો રેકોર્ડ રાખતા નથી. તમે શેર કરેલું લોકેશન પણ અમે જોઈ શકતા નથી અને તમારા સંપર્કોને Facebook સાથે શેર કરતા નથી.

આ અપડેટ સાથે, એમાંનું કંઈ પણ બદલાઈ રહ્યું નથી. એને બદલે, નવી અપડેટમાં તો લોકો માટે WhatsApp પર કોઈ બિઝનેસને મેસેજ મોકલવાના નવા વિકલ્પોનો સમાવેશ કરાયો છે અને અમે કેવી રીતે ડેટાનો સંગ્રહ અને ઉપયોગ કરીએ છીએ તેના વિશે તેમાં વધુ પારદર્શિતા પૂરી પાડવામાં આવી છે. ખરું કે આજે દરેક વ્યક્તિ WhatsApp પર બિઝનેસ પાસેથી ખરીદી કરતી નથી, પરંતુ અમે માનીએ છીએ કે આવનારા સમયમાં ઘણા લોકો આવું કરવાનું પસંદ કરશે અને એ જરૂરી છે કે લોકો આ સેવાઓથી વાકેફ હોય. આ અપડેટ Facebook સાથે ડેટા શેર કરવાની અમારી ક્ષમતામાં વધારો કરતી નથી.

અમે હવે એ તારીખને મુલતવી રાખી રહ્યા છીએ જે તારીખે લોકોને એ શરતો તપાસવા અને સ્વીકારવા માટે કહેવામાં આવશે. 8 ફેબ્રુઆરીના રોજ કોઈનું પણ એકાઉન્ટ સસ્પેન્ડ કે ડિલીટ થશે નહિ. WhatsApp પર પ્રાઇવસી અને સુરક્ષા કેવી રીતે કામ કરે છે તેને લગતી અફવાઓને દૂર કરવા માટે અમે પણ ઘણું બધું કરવા જઈ રહ્યાં છીએ. પછી અમે ધીરે ધીરે લોકો પાસે જઈશું અને 15 મેના રોજ બિઝનેસના નવા વિકલ્પો ઉપલબ્ધ બને તે પહેલાં તેઓને પોતાના અનુકૂળ સમયે પોલિસીને રિવ્યૂ કરવા જણાવીશું.

દુનિયાભરમાં લોકો માટે શરૂથી અંત સુધીની સુરક્ષા (એન્ડ ટૂ એન્ડ એન્ક્રિપ્શન) લાવવા માટે WhatsAppએ મદદ કરી હતી તથા હાલમાં અને ભવિષ્યમાં પણ આ સુરક્ષા ટેક્નોલોજીનો બચાવ કરવા માટે અમે પ્રતિબદ્ધ છીએ. અમે એવી દરેક વ્યક્તિના આભારી છીએ જેણે અમારો સંપર્ક સાધ્યો છે તથા હકીકત પહોંચાડવામાં અને અફવાઓને ફેલાતી રોકવામાં અમારી મદદ કરી છે. WhatsAppને પ્રાઇવેટ રીતે વાતચીત કરવાનું શ્રેષ્ઠ માધ્યમ બનાવવા માટે અમે અમારાથી બનતું બધું કરીશું.

WhatsApp ઝડપથી હવે સ્ટોર કાઉન્ટર બની રહ્યું છે, જ્યાં ચીજવસ્તુઓની ચર્ચાઓ અને વેચાણ કરવામાં આવે છે. કેટલોગથી લોકોને ઝડપથી જોવા મળે છે કે શું ઉપલબ્ધ છે અને બિઝનેસને ચોક્કસ ચીજવસ્તુઓ અંગે પોતાની ચેટ ગોઠવવા મદદ કરી છે. ચેટથી વધુને વધુ ખરીદી થઈ રહી હોવાથી, અમે લે-વેચને હજી સહેલું બનાવવા માગીએ છીએ.

WhatsApp પર કાર્ટ લાવવા માટે અમે ઘણા ઉત્સુક છીએ. આ સુવિધા આજથી શરૂ થઈ રહી છે. જે બિઝનેસ એક સાથે જુદી જુદી ચીજવસ્તુઓ વેચતા હોય, તેઓ માટે કાર્ટ ખૂબ કામની સુવિધા છે. જેમ કે, સ્થાનિક રેસ્ટોરન્ટ અથવા કપડાંની દુકાન. કાર્ટથી લોકો કેટલોગ બ્રાઉઝ કરી શકે છે, જુદી જુદી ચીજવસ્તુઓ પસંદ કરી શકે છે અને બિઝનેસને એક મેસેજ તરીકે ઓર્ડર મોકલી શકે છે. ઓર્ડરની વિનંતીઓની ભાળ રાખવા, ગ્રાહકોની વિનંતીઓનું સંચાલન કરવા અને વેચાણ પૂરું કરવા માટે બિઝનેસ માટે કાર્ટની સુવિધા સહેલું કરી આપશે.

દાખલા તરીકે, રાજકોટમાં સ્થિત ઉત્તમ ટોય્સ નામની રમકડાંની દુકાનને આ સુવિધા થોડી વહેલી અજમાવવા માટે અપાઈ હતી અને તેઓએ અમને જણાવ્યું કે કાર્ટની સુવિધાથી ગ્રાહકોને પ્રોડક્ટ ઓર્ડર કરવાનું કેટલું સરળ રહે છે અને બિઝનેસને પણ તેનાથી કેવી રીતે ઓર્ડરના વ્યવસ્થાપનમાં મદદ મળે છે.

કાર્ટ વાપરવું સહેલું છે. તમને જોઈતી ચીજવસ્તુઓ શોધો અને "કાર્ટમાં ઉમેરો" પર દબાવો. એક વાર તમારે જોઈતી વસ્તુઓ તમે કાર્ટમાં ઉમેરી લો, પછી બિઝનેસને એ મેસેજ તરીકે મોકલો. તમે કાર્ટ વાપરવા અંગેની વધુ માહિતી અહીં મેળવી શકશો.

આજે આખી દુનિયામાં કાર્ટની સુવિધા લાઇવ થવા જઈ રહી છે -- બરાબર આ તહેવારોની મોસમમાં. WhatsApp પર શોપિંગનો આનંદ ઊઠાવો!

આજથી, ભારતમાં લોકો WhatsApp દ્વારા પૈસા મોકલી શકશે. આ સુરક્ષિત પેમેન્ટ અનુભવ, પૈસા ટ્રાન્સફર કરવાની સુવિધાને એક મેસેજ મોકલવા જેટલું સરળ બનાવે છે. લોકો સુરક્ષિત રીતે કુટુંબના સભ્યને પૈસા મોકલી શકે છે અથવા તો રૂબરૂમાં રોકડ વ્યવહાર કર્યા વગર કે આસપાસની બેંકમાં ગયા વગર દૂર રહીને પણ લીધેલા માલસામાનની કિંમત હળીમળીને ચૂકવી શકે છે.

નેશનલ પેમેન્ટ્સ કોર્પોરેશન ઓફ ઇન્ડિયા (NPCI) સાથે ભાગીદારી કરીને WhatsAppની પેમેન્ટ સુવિધા ડિઝાઇન કરવામાં આવી છે. એમાં પણ, ભારત માટેની યુનિફાઇડ પેમેન્ટ ઇન્ટરફેસ (UPI), ત્વરિત પેમેન્ટ સુવિધાનો ઉપયોગ કરવામાં આવ્યો છે, જે 160થી વધુ બેંકોમાં વ્યવહાર કરવાની સગવડ પૂરી પાડે છે. ભારતમાં લોકોને મુખ્ય નાણાકીય વ્યવસ્થામાં સામેલ કરવાના ઉદ્દેશથી, ડિજિટલ પેમેન્ટની સુવિધા સરળ બનાવવા અને તેનો વપરાશ વધારવાની ભારતની ઝુંબેશમાં જોડાવાથી અમે ખૂબ ઉત્સાહિત છીએ.

ભારતમાં WhatsAppથી પૈસા મોકલવા માટે બેંક એકાઉન્ટ અને ડેબિટ કાર્ડ હોવું જરૂરી છે. બેંકોને WhatsApp સૂચનાઓ મોકલે છે, આ સુવિધા પૂરી પાડનારને પેમેન્ટ સર્વિસ પ્રોવાઇડર (પેમેન્ટ સેવા પ્રદાતાઓ) તરીકે પણ ઓળખવામાં આવે છે, જે UPIનો ઉપયોગ કરીને મોકલનાર અને મેળવનારનાં બેંક એકાઉન્ટમાં પૈસાની લેવડદેવડ કરે છે. ભારતમાં પાંચ અગ્રણી બેંકો સાથે કામ કરવામાં અમને ઘણી ખુશી થઈ રહી છે: ICICI બેંક, HDFC બેંક, Axis બેંક, ધ સ્ટેટ બેંક ઓફ ઇન્ડિયા અને Jio Payments બેંક. લોકો UPI સપોર્ટ કરતી ઍપનો ઉપયોગ કરતી કોઈ પણ વ્યક્તિને WhatsApp પર પૈસા મોકલી શકે છે.

લાંબાગાળે, અમે માનીએ છીએ કે WhatsApp અને UPIનું આ અજોડ માળખું સ્થાનિક સંસ્થાઓના અત્યારના સમયના અમુક મુખ્ય પડકારોને પહોંચી વળવામાં મદદ કરી શકે છે, જેમાં ડિજિટલ અર્થતંત્રમાં ગ્રામીણ ભાગીદારીનો વધારો કરવો અને આજ પહેલાં નાણાકીય સેવાઓથી વંચિત રહેલા લોકોને તેમાં સામેલ કરવાનો સમાવેશ થાય છે.

WhatsApp પરની દરેક સુવિધાની જેમ, પેમેન્ટની સુવિધા પણ મજબૂત સુરક્ષા અને પ્રાઇવસીના સિદ્ધાંતો પર બનાવવામાં આવી છે, જેમાં દરેક પેમેન્ટ માટે પોતાનો UPI પિન નાખવો જરૂરી છે. iPhone અને Android પર ઍપનું લેટેસ્ટ વર્ઝન વાપરનારા લોકો માટે WhatsAppની પેમેન્ટ સુવિધા હવે ઉપલબ્ધ છે.

અત્યારે, WhatsApp મેસેજ લગભગ કાયમ માટે આપણા ફોન પર રહે છે. ખરું કે મિત્રો અને કુટુંબો સાથે વિતેલી યાદો સાચવી રાખવી સારી વાત છે, પણ આપણે મોકલીએ એ બધું જ કાયમ માટે રહે એ જરૂરી નથી.

અમારો ધ્યેય તમને WhatsApp પરની વાતચીતોનો રૂબરૂ અનુભવ આપવાનો છે, જેથી તેને કાયમ માટે સાચવવાની જરૂર ન રહેવી જોઈએ. એટલા માટે જ અમે WhatsApp પર ગાયબ થતા મેસેજનો વિકલ્પ રજૂ કરતી વેળાએ ઉત્સાહિત છીએ.

જ્યારે ગાયબ થતા મેસેજ ચાલુ કરેલા હોય, ત્યારે કોઈ ચેટમાં મોકલેલા નવા મેસેજ 7 દિવસ પછી ગાયબ થઈ જશે, એનાથી વાતચીત વધુ હળવી અને વધુ પ્રાઇવેટ બની શકશે. એકબીજા સાથેની વ્યક્તિગત ચેટમાં બંનેમાંથી કોઈ પણ વ્યક્તિ ગાયબ થતા મેસેજને ચાલુ કે બંધ કરી શકે છે. ગ્રૂપમાં, એડમિને પાસે નિયંત્રણ હશે.

હમણાં અમે 7 દિવસના સમય સાથે આ સુવિધા ચાલુ કરી રહ્યાં છીએ, કેમ કે વાતચીતો હંમેશાં માટે ન રહેવાને કારણે અમને લાગે છે કે એનાથી મનની શાંતિ મળે છે અને એ વ્યવહારું પણ છે કેમ કે તમે શાના વિશે વાતચીત કરો છો એ ભૂલશો પણ નહિ. તમે અમુક દિવસ પહેલાં મેળવેલા શોપિંગ લિસ્ટ કે દુકાનનું સરનામું, તમને જરૂર હોય ત્યાં સુધી રહેશે અને કામ પતી ગયા પછી ગાયબ થઈ જશે. આ વિશે તમે વધુ માહિતી મેળવવા સાથે ગાયબ થતા મેસેજની સુવિધા કેવી રીતે ચાલુ કરવી એ વિશે તમે અહીં વાંચી શકો છો.

અમે આશા રાખીએ છીએ કે તમને ગાયબ થતા મેસેજની સુવિધા વાપરવાની મજા આવશે, જે આ મહિને તમામ વપરાશકર્તાઓ માટે ખુલ્લી મુકાઈ રહી છે.

પાછલા કેટલાક વર્ષોમાં, અમે વ્યક્તિગત રીતે સંપર્ક કરવા માટે મેસેજિંગ ઍપ્લિકેશનો તરફનો એક વાસ્તવિક ઝુકાવ જોયો છે અને બિઝનેસને આગળ વધારવા માટે વધુને વધુ લોકો WhatsApp પર આધાર રાખતા થયાં છે.

ઘણી બધી જૂની રીતો જેનો ઉપયોગ કરીને લોકો અને બિઝનેસ એકબીજાનો સંપર્ક કરે છે તે હવે વપરાશમાં નથી. જ્યારે બિઝનેસ વાર્ષિક ધોરણે અબજો રૂપિયા ફોન કૉલ, ઇમેઇલ, SMS પાછળ ખર્ચે છે, ત્યારે લોકો એવું નથી ઇચ્છતા કે ફોન પર તેમને વધુ સમય રાહ જોવી પડે, તેમનો કૉલ એક વ્યક્તિથી બીજી વ્યક્તિને ટ્રાન્સફર થયો રહે અને તેમનો મેસેજ પહોંચ્યો છે કે નહિ તેવી અનિશ્ચિતતામાં તેઓને રહેવું પડે.

દુનિયા ફરતે ફેલાયેલી મહામારીએ સ્પષ્ટ કરી દીધું છે કે બિઝનેસ માટે પોતાના ગ્રાહકોને સેવા પૂરી પાડવા અને વેચાણ કરવા માટે ઝડપી અને અસરકારક માધ્યમોની જરૂર છે. WhatsApp આ સમયમાં સરળ અને અનુકૂળ સાધન સાબિત થયું છે. દરરોજ 17.5 કરોડથી પણ વધુ વધુ લોકો WhatsApp Business એકાઉન્ટને મેસેજ મોકલે છે. અમારું સંશોધન જણાવે છે કે લોકો મદદ મેળવવા માટે બિઝનેસને મેસેજ કરવાનું પસંદ કરે છે અને તેઓ જ્યારે આમ કરે ત્યારે મોટેભાગે ખરીદી કરે તેવી શક્યતા હોય છે.

જોકે, હજી અમારે ઘણું વિકસાવવાનું બાકી છે. છેલ્લા બે વર્ષોમાં, અમે બધા પ્રકારના બિઝનેસને તેઓની ચેટનું સંચાલન કરવા માટે WhatsApp Business ઍપ અને WhatsApp Business API પૂરી પાડી છે. અસરકારક સાબિત થયેલી સુવિધા પર મેળવેલા પ્રતિસાદને અમે સાંભળ્યા છે અને અમે માનીએ છીએ કે ગ્રાહકો અને બિઝનેસને જોડવા માટે WhatsApp એ મેસેજિંગને સૌથી સારું માધ્યમ બનાવવામાં મદદ કરી શકે છે. એ તરફ અમે અમારું રોકણ નીચેના વિસ્તારોમાં વધારી રહ્યાં છીએ:

• ખરીદી - લોકો અમારી ઉપલબ્ધ પ્રોડક્ટ જોઈ અને તપાસી શકે તથા ચેટમાંથી જ ખરીદી શકે તે માટેની રીતો અમે વિકસાવીશું. અમે બિઝનેસ માટે આ સુવિધાઓને તેઓના ચાલી રહેલા વાણિજ્ય અને ગ્રાહક ઉકેલોમાં સામેલ કરવાનું સહેલું બનાવવા પણ ઇચ્છીએ છીએ. આ એવા ઘણા નાના બિઝનેસને મદદ કરશે જે આ સમયમાં સૌથી વધુ અસર પામ્યા છે.
• Facebookની હોસ્ટિંગ સેવાઓ - બિઝનેસની ટેક્નોલોજી માટેની અલગ-અલગ જરૂરિયાતો હોય છે અને તેઓ જે કંપનીઓ સાથે કામ કરે છે ત્યાં ગ્રાહકો સાથેના વાતચીત વ્યવહારને હોસ્ટ કરવા અને તેનું સંચાલન કરવાનો વિકલ્પ ઇચ્છે છે, અને ખાસ કરીને જ્યારે ઘરેથી કામ કરવાનું ચલણ વધ્યું છે એની સાથે આ માંગ વધી રહી છે. એટલે જ આવનારા મહિનાઓમાં, અમે છેલ્લા બે વર્ષોમાં જેઓની સાથે કામ કર્યું છે એવા અમારા બિઝનેસ સોલ્યૂશન પ્રોવાઇડર સાથેની અમારી ભાગીદારીને વધારવાની યોજના ઘડી રહ્યા છે. અમે બિઝનેસ માટે તેઓના WhatsApp મેસેજના સંચાલન માટે હોસ્ટિંગ સેવાઓ કે જેને Facebook દ્વારા બહાર પાડવાની યોજના છે તેની મારફતે એક નવો વિકલ્પ પણ પૂરો પાડીશું. આ વિકલ્પ પૂરો પાડવાથી નાના અને મધ્યમ કદના બિઝનેસ માટે શરૂઆત કરવાનું, પ્રોડક્ટનું વેચાણ કરવાનું, સ્ટોકનો તાળો મેળવવાનું અને તેઓને મળતા મેસેજનો ઝડપથી જવાબ આપવાનું - પછી ભલેને તેઓના કર્મચારીઓ ક્યાંય પણ હોય, સરળ બની જશે.
• બિઝનેસને વેચાતી સેવાઓ - અમારા દ્વારા ઓફર કરવામાં આવતી સેવાઓ માટે અમે બિઝનેસ ચલાવતા ગ્રાહકો પાસેથી ચાર્જની વસૂલાત કરીશું. એમ કરવાથી જ્યારે અમે 200 કરોડથી વધુ લોકોને મફતમાં શરૂથી અંત સુધી સુરક્ષિત મેસેજ, વીડિયો અને વોઇસ કૉલિંગની સુવિધા પૂરી પાડીએ અને તેનો વ્યાપ વધારીએ ત્યારે WhatsAppને પોતાના બિઝનેસને વિકસાવવામાં મદદ મળશે.

અમે જાણીએ છીએ કે મોટાભાગના લોકો મિત્રો અને કુટુંબ સાથે માત્ર વાતચીત કરવા માટે WhatsApp વાપરવાનું ચાલુ રાખશે, એટલે જ અમે સરસ નવી સુવિધાઓ વિકસાવવાનું અને લોકોની પ્રાઇવેટ વાતચીતોને સુરક્ષિત રાખવાનું ચાલુ રાખીશું.

અમે માનીએ છીએ કે WhatsApp પર ઉમેરવામાં આવેલા આ વધારાના અનુભવો ઘણાં લોકો અને બિઝનેસની સાચી જરૂરિયાતોને સંતોષે છે, પછી ભલે તેઓ પાસે હોય કે દુનિયાના કોઈ પણ ખૂણે બેઠા હોય. આગામી સમયમાં રજૂ થનારી સેવાઓ વિશે અમે ખૂબ ઉત્સાહિત છીએ અને આવનારા મહિનાઓમાં અમે આ સેવાઓને ક્રમશઃ બહાર પાડીશું.

ચેટમાં શેર કરીને ઘણી વધુ વખત ફોરવર્ડ કરેલા મેસેજ પર WhatsApp ફોરવર્ડ કરેલોનું એક ખાસ લેબલ મૂકે છે. આ બે તીર લોકોને એ જાણવામાં મદદ કરે છે કે તેમને મળેલો મેસેજ તેમના કોઈ નજીકના સંપર્કે લખેલો નથી. આ વર્ષની શરૂઆતમાં, WhatsAppનું ખાનગીપણું જાળવી રાખવા માટે અમે આવા મેસેજ એક વખતમાં કેટલી વખત મોકલી શકાય તેની મર્યાદાઓ સેટ કરી હતી.

આજે, અમે ચેટમાં બિલોરી કાચના બટનને દબાવીને આવા મેસેજને ખાતરીપૂર્વક તપાસવાની એક સરળ રીત આપી રહ્યા છીએ. સરળ રીતે મેસેજ શોધવાની સુવિધાથી લોકોને ઘણી વખત ફોરવર્ડ કરાયેલા મેસેજની ખરાઈ કરવા માટે તે મેસેજ અંગેના સમાચારના પરિણામો અને માહિતીના બીજા માધ્યમો શોધવામાં મદદ મળે છે.

વપરાશકર્તાઓ મેસેજને તેમના બ્રાઉઝરથી અપલોડ કરીને આ સુવિધા વાપરી શકે છે અને WhatsApp તે મેસેજ ક્યારેય જોતું નથી.

Android, iOS અને WhatsApp વેબ માટે WhatsAppનું લેટેસ્ટ વર્ઝન વાપરતા બ્રાઝિલ, ઇટલી, આયર્લેન્ડ, મેક્સિકો, સ્પેન, યુકે અને યુએસના લોકો માટે આજથી વેબ પર શોધવાની સુવિધા શરૂ કરવામાં આવી રહી છે.

સમગ્ર વિશ્વના બિઝનેસ ફરીથી ખુલવાની અને ઓનલાઇન વ્યવહારો વધારવાની તૈયારી કરી રહ્યા છે ત્યારે લોકોને પ્રશ્નો પૂછવા, માહિતી મેળવવા કે તેમને જોઈતી વસ્તુ ખરીદવા માટે બિઝનેસનો સંપર્ક કરવાના સરળ માધ્યમોની જરૂર છે.

આજની તારીખે અમે 5 કરોડથી વધુ WhatsApp Business ઍપ વાપરનારાઓને સપોર્ટ કરી રહ્યા છીએ. WhatsApp Business API પરના હજારો મોટા બિઝનેસ બજારમાં પોતાની આગવી ઓળખ ઊભી કરી શકે તે માટે મદદરૂપ થવા અમે નવી સુવિધાઓ લાવી રહ્યા છીએ. જેમાં બિઝનેસ સાથે ચેટ શરૂ કરવાની અને તેઓ કયો માલસામાન અને સેવાઓ ઓફર કરે છે તે જોવાની સુવિધાઓનો સમાવેશ થાય છે.

QRનો ઉપયોગ કરીને કોઈ બિઝનેસ સાથે ચેટ શરૂ કરવી

QR કોડ એકદમ સરળ રીતે બિઝનેસ સાથે ચેટ શરૂ કરવાનું ડિજિટલ માધ્યમ છે. આ પહેલાં, જ્યારે લોકો પોતાની પસંદના કોઈ બિઝનેસના સંપર્કમાં આવતા, ત્યારે એક-એક કરીને તેના WhatsApp નંબર તેમના સંપર્કોમાં ઉમેરવાની જરૂર પડતી હતી. હવે, ચેટ શરૂ કરવા માટે લોકો સરળતાથી બિઝનેસના સ્ટોર, પ્રોડક્ટના પેકિંગ કે રસીદ પર દર્શાવેલો QR કોડ સ્કેન કરી શકે છે.

દાખલા તરીકે, ઉત્તમ ટોય નામની રાજકોટની રમકડાંની એક દુકાને અમને આ સુવિધાને ટેસ્ટ કરવામાં મદદ કરી હતી. આ દુકાન તેઓના માલસામાનના પેકેજિંગ પર અને રમકડાંના ટેગ પર QR કોડ લગાવે છે.

QR કોડ સ્કેન કરવાથી ચેટ ખૂલશે જેમાં બિઝનેસ દ્વારા વાતચીત શરૂ કરવા માટે પહેલેથી બનાવેલો મેસેજ દેખાશે. આપમેળે જવાબ મોકલવાની સુવિધા ચાલુ કરવાથી, વાતચીત આગળ ધપાવવા માટે બિઝનેસ તરત જ તેમના કેટલોગ જેવી કોઈ માહિતી મોકલી શકે છે. QR કોડ વાપરવાનું શરૂ કરવા માટે, બિઝનેસ આ ઝડપી પગલાં અનુસરી શકે છે.

WhatsApp Business ઍપ અથવા WhatsApp Business APIનો ઉપયોગ કરી રહેલા દુનિયાભરના બિઝનેસ માટે QR કોડ આજથી ઉપલબ્ધ થઈ રહ્યા છે.

બિઝનેસ શું પૂરું પાડે છે એ જાણવા માટે કેટલોગ શેર કરવાની સુવિધા

કેટલોગ બિઝનેસને તેમનો માલસામાન અથવા સેવાઓ પ્રદર્શિત કરવાની સુવિધા આપે છે, જે વેચાણ વૃદ્ધિમાં તેમની મદદ કરી શકે છે. ગયા વર્ષે લોન્ચ કર્યા પછી, લોકો માટે WhatsApp પર બિઝનેસ સાથે વાતચીત કરવાની આ લોકપ્રિય રીત બની ગઈ છે. હકીકતમાં, દર મહિને 4 કરોડથી વધુ લોકો WhatsApp પર બિઝનેસના કેટલોગ જુએ છે.

લોકો માટે પ્રોડક્ટ શોધવાનું વધુ સરળ બનાવવા માટે, અમે કેટલોગ અને દરેક વસ્તુને વેબસાઇટ, Facebook, Instagram અને બીજે ક્યાંય પણ લિંક તરીકે શેર કરવાનું ઉપલબ્ધ બનાવી રહ્યા છીએ. અને જો લોકો તેમને મળેલું કેટલોગ કે વસ્તુને મિત્રો કે કુટુંબીઓ સાથે શેર કરવા માગતા હોય, તો તેઓ બસ લિંકને કોપી કરીને તેને WhatsApp અથવા બીજી કોઈ જગ્યાએ પણ શેર કરી શકે છે.

કેટલોગની લિંક બધે જ ઉપલબ્ધ છે અને તેને કેવી રીતે શેર કરવી તે અંગે બિઝનેસ અહીં શીખી શકે છે.

અત્યારે બિઝનેસ નવી હકીકતને સ્વીકારીને તેની સાથે સુમેળ સાધવાનો પ્રયત્ન કરી રહ્યા છે અને તેને સરળતાથી ચલાવવાનો માર્ગ લાંબો અને પડકારજનક રહેશે, આવા સંજોગોમાં અમે તેમને સપોર્ટ કરવાના પૂરતા પ્રયત્નો કરવા માગીએ છીએ.